La racolta da safràna a Tumegl e sut tetg

Igl e 13 ons c’igl interprendider a pur Othmar Caviezel cultivescha safràna sen sieus er a Davos Dusch sur Tumegl. Da cultivar safràna e el vagnieu animo igls ons ‘90, a caschùn da vacànzas agl vitg valesan da Mund ca valeva sco «unic liac da la safràna» an Svizra. Suainter egn ple lùng taimp da preparativas a la tscheartga da tschagulas adatadas â’l antschiet igls 2012 da cultivar safràna an Tumleastga ca para adatada par quella.

Quels gis â Othmar Caviezel schino la 13aval racolta. Quella e betga gartageada sco lezas digls ons passos. Dantànt ca la racolta digl on passo e stada egna da record ca gli â purto var egn kilo safràna da las radund 500 000 tschagulas, e’gl sto uon me biabagn la measadad. Quegl e da muntada par sieus manaschi an vesta a la racolta fadiusa, par la quala el impiegava igls ons passos antocen 16 parsùnas a ca racoltavan mintga gi trànter 10 000 a 16 000 flurs, da las qualas igl vean scarplieu tres antocen sis fils cotschens digl pistil. Igls ezs cuntegnan la speztga da la safràna.

Besclas spezialas pigl cuntegn custevel

Quest atun ân las flurs antschiet a flurir gea igls 1. d’october, peia var otg gis ple bòld c’oters ons. La racolta varieava trànter 3000 a 6000 flurs par gi. Igls fils cotschens racoltos cun grànda pazenztga vignan alura setgantos da notg a temperaturas da 30 antocen 35 gros. Igl gi sessur vignani magasinos agl stgir d’egna trucla d’aluminim antocen la fegn digl on ne l’antscheata da schaner. Alura vean la safràna spira pacatada an besclas da 120 miligrams ne an purziùns dad egn antocen plirs grams – a fatga vanala.

Parquegl ca Othmar Caviezel cultivescha da maniera biologica, venda el sia safràna ear an besclas spezialas: las purziùns pintgas an egna bescleta sarada cun clacùn – ascheia samantegna igl aroma – a las quantitads pli gràndas an egna bescla nera ca lascha betga penetrar glisch par betga donagear la calur da la speztga.

La vendita vomi fetg bagn, gi igl pionier da la safràna tumleastgegna. La grànda part vendi el oziglgi via internet. Mo la safràna tumleastgegna po ear vagnir cumprada an otg stizùns da la valada, a fieras agls vitg a tier igl cultivatur sez c’â danov er egna pagina d’internet.

Plaschevel ambaladi pigl or cotschen

Sia purschida cumpeglia sper la safràna spira, sal da safràna, trefigl-tschagrùn a pralinas da safràna – produtgeadas da la renumada Casa Nobile a Bätterkinden – a d’egn on annà ear gervosa da safràna. Leza brassa Othmar Caviezel cun egn bierer professiunal mintgame an pintgas quantitads.

La feglia Paula â stgafieu egn nov pacatadi pigls products da safràna da sieus bab. «Par me e’gl sto impurtànt da stgafir anzatge plaschevel, ca safa bagn cun la safràna ca dariva digl Oriaint», gi la dissigneadra da products. Quegl expriman igls musters giagls segls pacatadis, mussànd mintgame ornamaints da flurs stilisadas digl cuntegn.

Othmar Caviezel aczentuescha ear la muntada medizinala da la safràna ca rinforzi la nearva a vegi egn efect antidepressiv. Quegl eari ancunaschaint gea digl taimp antic.

La qualitad vean examinada

Ear uon â Othmar Caviezel fatg controlar sia safràna digl «Institut svizer par l’examinaziùns da qualitad» a Dietikon ca urainta la spireztga, la calur a la qualitad da seas products, da maniera c’igls cumpraders vegian la garanzeia par products da bùna qualitad.

Plenavànt e el a la tscheartga d’egn nov er, parquegl c’igl taratsch digl er actual segi sduvro suainter dudesch ons a betga ple adato par cultivar safràna. Pigl mumaint e quel clos cun egna closira da dus meters òlteztga, par ca las salvaschegnas schmaglian betga la figlia da la safràna. Digl november antocen la fegn da marz e quella agl stadi da la fotosintesa, quegl vut gir, la figlia produtgescha l’energeia par la proxima racolta ca s’acumulescha da stad an las tschagulas.

Othmar Caviezel e intenziuno da mantaner sia producziùn da safràna tumleastgegna ear igls ons vagnaints.