«Nut a mido la veta an moda ple pardirevla ca l’electrizitad»
La stad ca vean dat igl forza an la Val Schons – an furma digl gieu agl liber «Das Kraftwerk». Miez november e sto ad Andeer igl kickoff da quel grànd project cultural. Daniel Camenisch e igl president digl comite d’organisaziùn digl teater «Das Kraftwerk». Tenor el vean a custar igl project cultural anturn egn miez miliùn fràncs.
Var 140 parsùnas en stadas da la partida igls 15 da november 2025 tier la lantschada digl grànd project cultural «Das Kraftwerk» digl proxim on. L’ideia e da realisar tier la zentrala hidraulica a Balamburtg egn gioi agl liber ca tematisescha – an tres lungatgs – sco igl consum a la producziùn da la forza electrica ân cuntanschieu a transfurmo la val.
Purtadra da que grànd project e la Cuminànza Culturala Val Schons. Igl president digl comite d’organisaziùn e Daniel Camenisch c’e ancunaschaint sco expeart da comunicaziùn. El â mano miez november tras igl suaintermiezgi da kickoff ad Andeer.
FMR: Co e la Cuminànza Culturala Val Schons anzuma vagnida sen l’ideia da planisar egn gioi liber?
Daniel Camenisch: La fegnamira da la Cuminànza Culturala e dad organisar mintga peer ons egn project ple grànd, sper quels pintgs projects ca nus realisagn. Nus lagn radir anzemel la glieud par far anzatge da cuminànza a ver egn bùn tains. An tains da las medias sozialas a da la digitalisaziùn imparsunala vagn nus da promover la cuminànza.
Tge en igls Voss proxims pass d’organisaziùn par Vus sco president?
Jou amprov da ver la vesta sur tut, peia da taner aint tut igls termins, vurdar ca nus rivagn anavànt cun l’organisaziùn a ver adigna egn tgit segl rom finanzial. Ear la comunicaziùn e la mia part sco ear la fatschenda digls bigliets. Mintgegn â las sias leztgas ad ussa stuainsa radir anzemel que puzzle tier egn grànd maletg.
Tres acturs professiunals en part digl project. Partge vez sadezidieu gest par quels?
Igl autur Felix Benesch scriva egn toc plagn tensiùn. Parquegl vainsa ancuretg glieud professiunala ca va a paregl cun quellas rolas. L’Anita Iselin â sias rischs an la Val Schons, ella e carschida sei ad Andeer a nus eassan fetg loschs ca ella gioja cun nus. Cun l’istorgia ad igl svilup digl cudesch c’igl Felix Benesch scriva, vainsa vieu tge rolas c’igl dat ad ascheia vainsa sadezidieu quànts acturs professiunals ca nus duvragn. Cun Liviana Degen a Peter Hottinger vainsa cato acturs cunaschaints c’en adatos par quellas rolas. Acumpagnieu musicalmeing da Christian Klucker, ca magna igl cor da project, dat quegl siir egna stupenta tgossa!
Da tge tracta igl teater «Das Kraftwerk» anzuma?
Nut a mido la veta an la nossa regiùn an moda ple pardirevla ca las ovras electricas a l’electrizitad. Cun «Das Kraftwerk» schagn nus reviver egn tains fetg muanto – igl spiert da pionier, las parsunalitads digls impressaris visiunaris, igls dramas ad igls fatgs scurils anturn que project da tschantaner.
A co vezi or cun szenas rumàntschas?
Par nus e’gl impurtànt da ver aint diferaints lungatgs. Igl toc vean ad easser tudestg, rumàntsch ad ear taliàn. Igl lungatg rumàntsch a par nus egna grànda muntada an la Val Schons.
Co vean igl project da tala gràndeztga finanztgieu?
Egna grànda part vean finanztgeada da sponsurs a partenaris, sco par exaimpel da las Ovras electricas digl Ragn Posteriur, la KHR, a blears oters ca nus eassan fetg angraztgevels. L’otra part vean finanztgeada sur las antradas. L’infrastructura, las lubientschas a tut anturn ad anturn custa blears raps. Mo jou tratg ca nus rivagn tras bagn cun egn budget da 500 000 fràncs.
Tge vean ad easser la ple grànda sfida?
Egna grànda sfida e siir igl aspect finanzial. Mo quegl ca nus savagn betga influenzar, sco par exaimpel l’ora, e egna tgossa ca savess ir a traviers. Sch’igl plova ad igl fuss aua grànda, urezis near ànc mender nev … scha lua savessan nus betga giujear igl teater. Gliez fuss par me igl worst case. Mo nus speragn ca tut vomi bagn, cun forza per la cuminànza da la valada.
Tgi ca vut schon ussa reservar egn bigliet digl gieu agl liber «Das Kraftwerk», sa pustar quel sen la pagina d’internet da la Cuminànza Culturala Val Schons: www.cuminanzaculturala.ch.
Gust da leger dapli?