Or digl calender
Sen las crùnas an stizùn en els betga da mancantar agl october a november: Igls calenders d’advent. Igl tains digls sempels calenders d’advent da tschiculata e passo – ad ear quel digls calenders originals cun maletgs davo mintga esch. Igl dat els ànc, mo els ân stuieu far plaz a la nova generaziùn da calenders d’advent. Quels cun tarmagls, cun make-up, cun candelas near cun bavràndas. Ea, igl dat parfegn egn calender d’advent par tgàns – amplanieu cun 24 delicatessas pigl teli. Tutegna veda tge product c’ign partratga, jou garantesch, c’igl dat el sco calender d’advent.
Jou veva da buaba la furtuna ca la mia madretscha zambargeava seza par me calenders d’advent. Mintg’on catava ella novas manieras creativas da zupar las 24 surpresas. Par exaimpel an rolas da pulpier da tualeta near palandos cun egn cluper veda egna corda. Ear tge ca sazupava agls pacetets veva ella ancuretg or cun bleara careztga. Egn gi eara quegl egn peer bealas socas, egn’oter gi egna legra fotografeia da nus duas. Igl calender d’advent da la mia madretscha eara mintg’unviern egn highlight ca jou ve mena ple amblido.
Ascheia ve jou, ussa ca sund seza ear madretscha, ear antschiet da zambargear da quels calenders. La ple beala lavur e da sapartartgear or da tge materials ca savess far igl calender. La variànta cun las rolas da pulpier da tualeta ve jou natiralmeing schon cuptgieu da la mia madretscha. Uon ve jou par egn fagliol zambargieu igl calender or da buteglias da PET. Quellas ve jou taglieu sei a do calur sco umens da nev. Par l’oter fagliol ve jou transfurmo egna grànda stgatla da cartùn an egna tgea d’advent. Andavains ve jou zavro la stgatla an 24 zons ad ordafora taglieu aint igls 24 eschs. Sper igl cunti giapunes a la cola, ve jou ànc egn oter cumpogn fidevel par quellas lavurs: Igl mieus fegl da tres ons.
Igl e davanto egna beala tradiziùn ca nus dus surprandagn agl november la stiva, noua ca nus zambargiagn, tagliagn or a caluragn antocen c’igls calenders en fitos. Tgi ca â schon egn’eada ampruvo da zambargear anzatge cun egn unfànt da tres ons, sa c’ign sa dabot carpar las gretas. Surtut sch’igl e involvo fieters a cola. Mo schi prest sco ign lascha liber l’ideia fixa sco igl calender vess da ver or a la fegn, sa quegl propi easser egna beala activitad. Igl gida sch’ign â oravànt mess avunda zitis giobass a tira betga gest aint la ple beala raglia. A sch’ign planisescha avunda tains. A sch’ign â egn partenari ca va alura egna peaza ordafora cugl unfànt sch’igl duess vagnir megna caotic.
Alura e la grànda amparada tge meter aint agls calenders. Igl e nut aschi sempel da catar 24 tgossetas adatadas – near agl mieus cass 48. Cun la mi’experientscha da far calenders, â’gl sacumprovo da tschearner igls objects or da las suandàntas tres categoreias. 1. Egn bùn mix da magliaretschs: Betga me tschiculatetas, mo ear betga me vaflas da ris. 2. Egn peer beals tarmagliets. 3. La mi’categoreia preferida: Varia. Sut quella va tut gl’oter: Par exaimpel savùn ca dat calur l’aua da bogn. Near artetgels da tualeta cun egn legher motiv, sco egn barschùn da daints near plasters. Ad alura ànc material ad instrucziùns par egn pintg project da zambargear anzatge festiv. Cun quegl c’igls meas figliols en ànc pletost pintgs, sto quegl dantànt easser sempel a betga far megna blear lavur agls geniturs. Betga c’igls ez ân igl davos alura da star uras or landervei par zambargear egna cumplitgeada stela da Nadal or da cartùn.
Cun quegl c’igls meas dus fagliols vivan tuts dus an egn oter cantùn, e’gl ear betga d’amblidar l’antiera logistica davostier. Tarmeter igls calenders cun la posta vean betga an dumonda. Parquegl en las mias creaziùns propi betga stabilas avunda. Igl e peia da planisar egna visita a tuts dus ànc avànt igls amprems da dezember. La visita dastga dantànt ear betga easser megna bòld, ascheia c’igl resta ànc avunda tains da finalisar igls calenders. Da curt sund jou ànc vagnida egna tearz’eada madretscha. Igls proxims ons se jou peia tge far mintgame igl november.
Gust da leger dapli?