«Mai legra la glieud motivada»
Gia sco uffant emprenda el d’enconuscher il Grischun – saja quai, sch’el dastga accumpagnar collegas da ses bab a chatscha en il Surses ubain en champs da scola a Laax e Sursaissa. Fin ch’el sa chasa dentant en il chantun, vai 61 onns. Oz ha Heinz Huber ses center da vita en il Grischun e presidiescha la Banca Chantunala.
Bancas èn ses mund. Dapi ses emprendissadi ha el fatg in stgalim da carriera suenter l’auter ed ha emprendì d’enconuscher plirs dals pli enconuschents instituts da finanzas dal pajais (guarda box). Il davos è el stà sis onns schef da la Raiffeisen Svizra. Lezza è la segund gronda banca svizra, sch’ins quinta ensemen las passa duatschient bancas Raiffeisen.
Dapi il fanadur è Heinz Huber (61) dentant president da la Banca Chantunala Grischuna (BCG). Suenter prest sis mais en uffizi raquinta el co ch’el è sa vivì en – tant en il chantun sco en sia nova incumbensa – e tge che fa losch el.
FMR: Vossa carriera avais Vus cumenzà cun in emprendissadi tar la UBS. È quai stà ina buna decisiun?
Heinz Huber: Per mai èsi stà la gista decisiun. Entaifer ils trais onns da l’emprendissadi hai jau emprendì d’enconuscher tuttas fassettas da la fatschenta da banca.
Tgeninas fissan quai?
Jau sun stà en la partiziun d’affars da credits ed hai emprendì d’enconuscher la cussegliaziun d’investiziuns. Jau hai gì invista en l’administraziun dad aczias e vaglias e sun stà per in temp en las partiziuns da pajaments e da contabilitad. Quai tut m’ha purschì ina vasta invista co ch’ina banca funcziuna insumma.
Sco president da la banca chantunala savais Vus pia precis, co ch’i va cun quels che lavuran a la front?
Quai sai jau en mintga cas. Per l’ina perquai ch’jau l’hai fatg mez, ma era perquai ch’jau tschertg il contact cun ils collavuraturs e las collavuraturas. Da preschent visit jau tut ils diesch sezs regiunals da la banca. Fin il schaner 2026 sun jau lura stà en tuttas regiuns.
Tge impressiun avais Vus da las filialas da la BCG en cumparegliaziun cun autras bancas?
La BCG ha sa chapescha sia atgna cultura d’interpresa. La glieud ch’jau hai inscuntrà, è fitg motivada. E tge che ma fa losch: La glieud s’identifitgescha fermamain cun la banca. Quai sentan er ils clients e las clientas.
Vus essas ussa prest in mez onn president da la banca chantunala. Co As sentis Vus en il Grischun?
Fitg bain, jau dastg lavurar en in lieu nua che auters fan vacanzas. En pli sun jau collià gia dapi mia uffanza cun il chantun.
Tge colliaziuns avais Vus?
Mes bab ha per exempel accumpagnà collegas a la chatscha sur Tinizong en il Surses, pli tard hai jau era dastgà ir cun els. Da mat hai jau passentà qua ils champs da scola: la stad a Sursaissa, l’enviern a Laax. Pli tard avain nus cumprà in’abitaziun da vacanzas. Oz hai jau là mes center da vita e sun stabel en il chantun Grischun.
Vus presidiais il cussegl da la BCG. Cun tge sa fatschenta il cussegl da banca per il mument?
Quest onn èsi segir la strategia che la banca definescha mintga tschintg onns. Ussa determinain nus noss accents per la perioda dal 2026 fin il 2030. Nus avain en senn da communitgar ils accents ensemen cun il quint annual.
Ils ultims onns ha la BCG cumprà interpresas – era per pudair crescher. Vul ins cuntinuar a cumprar interpresas?
Ins ha vulì reducir la dependenza da la fatschenta cun las differenzas da tschains. Quai è era reussì e fa senn or da vista strategica.
Cun «la fatschenta cun las differenzas da tschains» manegiais Vus ils credits ipotecars?
Gea, l’entira fatschenta cun ils credits. Igl è reussì da reducir questa dependenza. Cun la cumpra, resp. la participaziun vi dad interpresas han ins augmentà la cumpart tar las fatschentas da cumissiuns e da servetschs. Cun la nova perioda strategica na planisain nus dentant betg dapli acquisiziuns. Las acquisiziuns gia fatgas duain sa sviluppar enavant. Quai na vul dentant betg dir ch’ins n’examinass betg ina cumpra, sch’i sa porscha ina buna chaschun. Il martgà principal da la banca è e resta però il Grischun.
Tge svilups fan quitads al cussegl da banca?
Jau discur pli gugent da sfidas e sfidas èn a medem temp adina schanzas. Igl è da numnar trais champs. Sco emprim sent’ins en il svilup economic en Svizra tschertas malsegirezzas entras la discussiun da dazis. Lura ha la Banca naziunala svizra fixà in tschains da nulla pertschient, tge che smesa il spazi d’agir per las bancas. Sco segund èsi da numnar la demografia. La glieud vegn adina pli veglia en il Grischun. Sco banca ans stuain nus dumandar: Chattain nus anc persunal ed ils spezialists necessaris?
Ed il terz champ?
Ils basegns da la clientella sa midan cun la digitalisaziun. Ins sto investir. Ma nua precis èsi dad investir? A talas dumondas vegn la strategia a dar respostas.
Vus avais menziunà il svilup demografic che munta era: La banca ha damain clientella. Porscha il turissem ina schanza, per exempel en l’Engiadin’Ota cun clientella bainstanta?
Nus avain en il Grischun radund 50 % abitaziuns secundaras. Ils proprietaris da questas abitaziuns sa movan en noss spazi economic e quai porscha adina puncts da referiment. Per exempel pon els laschar administrar ina part da lur facultad da la BCG u ch’els giavischan forsa ina finanziaziun da lur chasa. Tals referiments ston ins nizzegiar a moda activa e quai fa era part da nossa strategia.
Tgeninas filialas da banca èn lura pli impurtantas? Quellas a Cuira u quellas en l’Engiadin’Ota?
Tuttas èn impurtantas.
E tge svilups fan plaschair al cussegl da banca?
Jau l’hai gia menziunà. Mai legra la glieud motivada che lavura en la banca e la buna cultura da manaschi cun in bun cumportament tranter ils collavuraturs e las collavuraturas. Quai è creschì sur onns. La banca giauda en il chantun ina buna reputaziun ed è cun passa 1000 collavuraturs e collavuraturas e passa 80 plazzas d’emprendissadi ina da las grondas patrunas en il Grischun.
L’uffizi da president da banca è atgnamain in pensum parzial. Quant lavurais Vus insumma per la banca? Essas Vus mintga di activ?
En patratgs sa chapescha bain. I dat emnas ch’jau sun mintga di preschent e lura datti emnas ch’jau lavur dus dis per la banca chantunala. En mintga cas è il presidi da banca mes mandat principal. Jau ma deditgesch da preschent bunamain exclusivamain a quest pensum.
Ils set commembers dal Cussegl da banca – quatter umens e trais dunnas – survegnan ensemen radund 700 000 francs l’onn. Pertge dovri ina uschè auta indemnisaziuns?
Jau tegn che la responsabladad d’in cussegl da banca vegnia sutvalitada. La Banca Chantunala Grischuna è in grond institut en Svizra. Il volumen dad ipotecas importa radund 22 milliardas francs, las facultads da la clientella summeschan a 52 milliardas. La branscha da bancas è suttaposta a bleras regulaziuns ed è sa chapescha extremamain survegliada, tranter auter da la FINMA. Qua dovri autas qualificaziuns.
Cumpareglià cun autras bancas svizras – quant generusas èn las indemnisaziuns da la BCG?
Las indemnisaziuns sa chattan en la media, sch’ins cumpareglia cun autras bancas da la medema grondezza.
L’affera enturn René Benko ha fatschentà l’onn passà la BCG. Ha la banca en il fratemp lavurà si questa affera?
La firma da revisiun E&Y ha gea fatg ses rapport ch’è vegnì publitgà la primavaira 2024. Quel conferma ch’ils credits pertutgads èn vegnids dads confurm a l’urden e che la BCG è sa cuntegnida a moda correcta. Là nua ch’igl ha duvrà correcturas en ils reglaments da la banca, è quai vegni fatg. Intern han ins, sco che Vus schais, «lavurà si» tut quai.
Cura che Vus avais ponderà, sche Vus vulais daventar president da la BCG u betg, ha l’affera Benko forsa era fatg vegnir in zichel malsegir Vus?
Na, insumma betg. La BCG è ina banca bain chapitalisada. Ella ha ina buna posiziun en il martgà. Ch’ins s’expona en la fatschenta da credits magari er a ristgs, quai stat en la natira da la chaussa. Ma quai n’è mai stà in impediment.
Da l’emprendist al president
Cumenzà ha Heinz Huber (61) sco emprendist da banca. El ha percurrì ina carriera ch’el ha emprendì d’enconuscher tant ils pli gronds instituts bancars svizzers sco era las pli differentas funcziuns. Plirs onns ha el lavurà tar la UBS, la Credit Suisse ubain la Banca chantunala dal Turgovia. Sia davosa plazza è stada tar la Raiffeisen Svizra. Lezza ha el timunà sis onns sco schef. Dapi in mez onn è el president da la Banca Chantunala Grischuna (BCG). (fmr/vi)
Gust da leger dapli?