Ena «Partenza» cun pac da nov
Igls purtaders turistics dalla regiun da vacanzas da Savognin e Beiva on do pled e fatg sonda passada tar l’occurrenza «Partenza». Surdo è er nia igl premi turistic 2025, tgi vo eneda daple agl Hotel Post da Beiva.
La «Partenza» è gio siva da ples onns l’occurrenza per lantscher la staschung da stad u d’anviern ainten la regiun da vacanzas da Savognin e Beiva. Sonda passada ò chella gia li ainten la sala digl Hotel Piz Mitgel a Savognin. Radond 150 persungas èn stadas dalla parteida e mano tras igl program ò an moda cumpetenta e libra Melanie Salis.
Represchento Turissem Savognin Beiva ò Bettina Bergamin. Tanja Amacher, la directoura turistica, ò gia da renunztgier all’occurrenza perveia dad en’operaziun. Sa drizzos a giasts ed indigens èn er Ivar Jeker, igl directour administrativ da Savognin Pendicularas SA, Linda Netzer, la magnagestiun digl Parc Ela, Giovanni Netzer, igl intendant digl Origen Festival Cultural e Gregor Vellacher, igl directour administrativ da Beiva Runals SA e dalla Scola da skis Beiva.
Betg bler da nov
Ena survista dallas tematicas preschentadas alla «Partenza» da sonda passada: Tema central è pitost sto igl Parc Ela, cugl qual ins less er sa posiziunar pi ferm igl anviern. Giovanni Netzer digl Origen Festival Cultural ò menziuno tgi igl feil cotschen digl program d’anviern seian chest onn praulas. A Beiva dattigl aint igl Hotel Guidon da nov seis differentas pastas tgi vignan fatgas an tgesa. E scu tgi Ivan Jeker ò menziuno ò Savognin Pendicularas SA investia radond 1 milliun francs, chegl pitost davos las culissas, per sanaziuns tecnicas e per la compra d’ena nova maschina da far pista. A Savognin dattigl da nov ena schinumnada «disco da solt» a La Nars. Igl Hotel Jufa è ossa igl Hotel Aves ed è gio avert. La proxima fegn d’emda è de dallas portas avertas tigl Hotel Tgesa Romana, tg’è nia renovo cumplettamaintg. Li ò chesta fegn d’emda er l’avertura digl nov Café Casparin.
All’occurrenza dalla «Partenza» da chest onn èn damai neidas preschentadas tematicas e purscheidas gio bagn ancunaschaintas an la val.
«La gotta turistica»
Gio siva da bung 20 onns surdat l’organisaziun turistica da Surses igl premi «La gotta turistica». La giuria da chella concurrenza per la gastronomia, la hotellareia ed oters affars scu buteias èn gist igls giasts sezs. Digl december 2024 anfignen igl december 2025 on igls giasts da Surses pudia giuditgier tge travagl u menaschi tgi mareta igl premi. Igl amprem prietsch è doto cun 1700 francs, igl sagond cun 1200 francs ed igl terz cun 700 francs.
Nia detg è tgi affars pi pitschens vegian bagn en disvantatg tar chella concurrenza an cumparaziun cun en menaschi pi grond tg’ò daple giasts ed uscheia er plessas persungas tg’on la caschung da dar la vousch agl travagl preferia. Scu gio plessas gedas igls davos onns è igl premi principal ia a Martina Lanz tgi magna siva da prest 20 onns cun angaschamaint e passiun igl hotel da famiglia cun gronda tradiziun. Ella magna igl Hotel Post ainten la otgavla generaziun, tiers tgi dus nevs dad ella on gio surpiglia igl hotel, uscheia tgi chel resta an famiglia. La tgesa ò fitg bungs giasts fidevels tgi vignan passa 30 onns schi betg anc daple a Beiva e turnan adegna puspe gugent aint igl li agl Pass digl Gelgia.
Igl sagond prietsch ò retschet igl restorant Scuntrada da Tinizong, en local cun ena bunga cuschigna, products da qualitad, en bung servis e cunzont en travagl tg’ò avert sur onn. Per la direcziun da chel segna Andreas Stump. Eneda daple en premi on er gudagnea Maik Gantner e Gion Plaz tgi magnan cun gentilezza e tschaffen igl kiosk e restorant agl Lai Barnagn.
Gust da leger dapli?