Lectura Rumantscha

Ma porta ina «curtauna»!

Tge è «ina curtauna»? Sas ti quai? – Jau en mintga cas n’hai gì nagin’idea, fin ch’in collega m’ha tradì il misteri. Ina «curtauna» vegniva duvrada pli baud quasi mintgadi. Il Museum Regiunal Surselva (MRS) rimna e preschenta tals objects d’antruras, schebain ch’il museum a Glion è gist vegnì svidà dacurt – per al emplenir bainprest puspè – cun in nov concept museal. La directura dal MRS, Ursina Jecklin Candrian, vul metter paisa sin l’intermediaziun, sin declerar las chaussas. Tgi sa, forsa vegn lura era declerada la funcziun da la «curtauna».

Sch’ils uffants fan rir ils vegls

Avant in tempet hai jau vis in film documentar englais che ha mussà plirs experiments en ina chasa d’attempads. Quels experiments han cumprovà quant bain ch’i fa a las persunas pli veglias d’interagir cun uffants – da giugar, discutar e rir ensemen. Igl è bain pussaivel ch’in tal model cun bler barat tranter las generaziuns datti en 4 – 5 onns er a Scuol. Là è numnadamain planisada ina nova canorta gist sper la chasa per persunas attempadas.

La glieud motivada al spurtegl

Cura es ti ì la davosa giada per raps sin banca? – La digitalisaziun, ils bancomats ed ils telefonins remplazzan ils spurtegls. Ch’i valia tuttina la paina da visitar da temp en temp la glieud davos il fanestrigl da las bancas – almain tar la Banca Chantunala Grischuna (BCG) – quai è l’opiniun da Heinz Huber. En l’intervista cun la FMR ha declerà il nov president da la BCG: «La glieud è fitg motivada.» – Sche pia, subito sin banca!

E dal rest: Savevas ti ch’il chantun Grischun è in dals pli gronds cultivaturs da safran en Svizra? Quel vegn racoltà p.ex. a Müstair, a Sagogn ed a Tumegl. Perquai bun appetit cun il risot da quest onn!