Ün pêr milli francs
Cura vais piglio l’ultima vouta raps dal bancomat? E cura essas stos l’ultima vouta al fnestrigl da la banca per piglier raps? La munaida bluotta, l’unic mez leghel da pajer in Svizra, ün franc, spartieu sü in 100 raps, töchs da munaida e bancanotas, cha minchün füss oblio dad accepter per pajamaints tenor la ledscha (Bundesgesetz über die Währung und die Zahlungsmittel WZG)?
Eau sun sto avaunt ün temp tar la Banca Chantunela a Cuira e d’he stuvieu constater cha que nun es niaunch’uschè simpel da clapper quists raps – ils egens raps, s’inclegia!
Aint illa granda halla d’entreda as stu tschercher sia via traunter tuors da Jenga, maisinas da differentas otezzas (as investescha ils raps oter, scha’s tschainta sün ün sez da bar invezza sün üna pultruna?) e cubs da vaider. Svelt as vain accumpagno dad üna persuna gentila, serviziaivla chi porta sneakers alvs e chi dumanda, scha’s drouva agüd.
Na, eau nu sun aint in üna clinica psichiatrica, eau tscherch be il fnestrigl. Nu do que pü. Eau dess ir tar la recepziun – ah, que es ün hotel? – Na, que nu’s po durmir tar nus (tuots vaun a chesa a las 16.30).
La persuna davous la recepziun es eir fich gentila (port’la eir quists sneakers alvs?). Piglier raps? Ch’eau dess ir al bancomat. – Na, eau drouv ün pô dapü. Survaschellas as ozan – dapü? Ma quaunt? Eau bad il squitsch da’m stuvair güstificher. Ma simplamaing ün pô dapü, pervi da Nadel chi vain ed uscheja …
Que vessi stuvieu puster ün pêr dis aunz, disch’la. – Che? – Schi, ün pêr dis aunz, els nun hegian uschè bgers raps a disposiziun. Uossa es da manzuner ch’eau nu vaiva l’intenziun da fer ün «bank run» sülla Banca Chantunela e da piglier 400 milliuns francs e da chaschuner üna crisa finanziela cha’l Chantun stu salver la banca. Eau vulaiva piglier be ün pêr milli «stutzs».
Ma quella persuna am disch cha aint in quist edifizi grandius nun hegiane niauncha ün pêr milli francs? La Banca Chantunela. Stu ir a puster bancanotas tar la Banca Naziunela a Berna per me. Chi vegnan stampedas a Landquart ed alura purtedas aint in paquettins singuls a Cuira cul postin. Uscheja am metti avaunt que.
Stupefat scu ch’eau stun lo davaunt il «desk» la vain adimmaint ün tric: Ella so deactiver il limit dal bancomat. Ed uscheja vain que cha nus giains insembel tal prossem bancomat a piglier mieus raps. Que am pera scu cha que füss ün «express kidnapping», cur cha ella sto dasper me intaunt ch’eau pigl mieus raps our dal automat. Be ch’eau als poss tegner. Bod ch’eau vess lascho ün pô ad ella cha hegian darcho aint in lur chascha. Povra banca.
Gust da leger dapli?