Urari tgi plai agls «sgulanotgs»
Cun la midada digl urari digls meds publics profitescha er Surmeir. Igl davos curs da posta tgi parta da Casti vers Beiva allas 20.50 cursescha da nov igl antier onn. Las fegns d’emda durant la staschung dattigl da nov er curs tgi curseschan siva mesanotg.
A parteir digls 14 da december 2025 vala igl nov urari da posta da tren e da bus 2025/26. Er an Surmeir dattigl cun chella midada novas e miglras colliaziuns. Per exaimpel cursescha igl curs da posta tgi parta allas 21.30 da Coira vers Lai da nov sur onn. Igl amprem auto da posta tgi vo la dumang davent da Lai vers Coira parta da nov gio allas 04.53. Durant igl anviern curseschan da Lai a Coira e da Coira a Lai curs supplementars, dus curs igl avant mezde ed igl siva mezde. Tranter Casti e Lai curseschan da nov sur onn mintga 30 minutas ena posta. Anfignen ossa geva igl davos curs da posta davent da Casti allas 20.50 an direcziun Beiva angal la fegn d’emda. Da nov cursescha chel curs sur onn e betg ple angal igl venderde e la sonda. Tigl curs 581 Stierva-Mon-Salouf-Parsonz-Cunter-Savognin dattigl adattaziuns tigl taimp da viadi.
Allas 21.52 ed allas 22.52
Las pi grondas midadas u schizont novaziuns dattigl tigls curs da notg. Uscheia è pussebel igl venderde sen sonda e la sonda sen dumengia dad eir cun en bus davent da Casti allas 21.52 ed allas 22.52 vers Mon, venavant a Salouf, Riom e Parsonz, da lò venavant a Cunter ed anfignen Savognin e sen giaveisch er anfignen Tinizong. Igl curs da Tinizong an direcziun Casti via Savognin, Cunter, Riom, Parsonz, Mon e Casti chel parta allas 22.16 davent da Tinizong. Sen clom e sen reservaziun vo er en bus davent da Savognin allas 23.18 anfignen Casti e da lò sen giaveisch venavant anfignen Tavo.
Siva mesanotg
Da nov digl venderde sen sonda e da sonda sen dumengia dattigl en curs da Tusang a Beiva, chegl sen reservaziun ed ordinaziun via ena app speziala. Partenza è a Tusang allas 00.37 ed arrivada è a Beiva allas 01.20. En bus tgi vo da Tusang a Savognin chel parta schizont pir allas 03.01 davent da Tusang ed è a Savognin allas 03.26. Chel cursescha alloura angal sen ordinaziun e reservaziun. Da Beiva è da nov er pussebel da parteir cun en bus, sen clom e reservaziun allas 01.20 cun arrivada allas 01.49 a Casti e cun la pussebladad dad eir venavant a Lantsch u a Lai. Da Casti a Barvogn vo alla fegn d’emda en bus la notg allas 01.54 cun arrivada a Barvogn allas 02.23. Da chellas ouras parta alloura sen ordinaziun e giaveisch igl bus an direcziun Casti, cun arrivada a Tusang allas 03.09.
Sung ple tgi cuntaint
Reservar igl bus da notg è pussebel graztga alla app speziala. Adrian Ballat, igl vicemastral digl cumegn da Surses e la persunga iniziala per introdueir en bus da notg er an Surses ed an ena part dalla Val Alvra dei tgi per saveir a tge ouras tgi igls bus partan seia igl migler da far diever digl urari online dalla «SBB». Adrian Ballat ò detg anvers la FMR: «Ia sung ple tgi cuntaint cugl nov urari, tg’è nia realiso sen grond giaveisch ed er impuls dalla gruppa digl cunsegl digls giovens da Surses.» Sustign vegia chella gruppa er gia dalla suprastanza digl cumegn da Surses. Igls giovens vegian inoltro chella dumonda per l’introducziun d’en bus da notg e bel seia tg’ins vegia risguardo an senn positiv chella dumonda. A Lai e conturn dattigl gio chella purscheida digl bus da notg siva da dus onns. Persungas privatas tg’on en affar da taxi u da bus fon an incumbensa dalla posta chel sarvetsch er an Surses, scu chegl tg’è a Lai er igl cass.
Gust da leger dapli?