Giodair il mumaint

Star sü, ir aint in bogn, preparar la roba da lavur e la marenda, preparar meis cafè, ir oura sün balcun e lura finalmaing tour il prüm bun süerv da mia bavronda prediletta. Tuot quai in quietezza, sainza disturbis. Che bel mumaint. Pür uossa suna pronta per discuors, per tadlar che cha’l muond quinta.

Chi chi ha l’impreschiun da stuvair dumandar alch a mai avant cha meis ritual da bunura saja fini, tschüffa ün’ögliada noscha, e sgüra ningüna resposta.

Na, na uschè mal nun esa. Ma eu n’ha propi plü jent d’avair meis pos cun baiver meis prüm cafè. Perche es quai vairamaing uschè? No vain dudi quists ultims dis, quanta sgürezza cha rituals dan, quant importants chi sun per accumpagnar müdamaints, per ir d’üna fasa da vita in tschella o eir per tour cumgià e per festagiar. Illa psicologia as saja eir cha rituals individuals sun buns pella sandà mentala. Rituals han üna valur emoziunala ed i vegnan fats per ün scopo. I sun dimena daplü co be üna rutina dal minchadi. Rutinas nempe sun sco automatissems e capitan sainza chi’s sto esser consciaint.

Es dimena meis cafè da bunura ün ritual essenzial per meis bainstar? El ha in mincha cas üna valur emoziunala, eu m’allegr minchatant fingià la saira avant da til pudair baiver. Ma ingio es il sen o il scopo da quist ritual?

Eu n’ha üna jada provà da dar bada plü precis che chi capita aint in mai dürant quist mumaint special. Quist mumaint ingio ch’eu vegn oura sün balcun culla tazza choda in man, la savur dal cafè aint il nas e l’ajer frais-ch chi’m bivgnainta aint il di. Trar il flà e lura quist süerv da buntà. Eu sun preschainta, (sun) aint il mumaint, (sun) pro mai e nu douvr nügl’oter. Eu sun cuntainta cun quai chi’d es. E precis quai esa! In congual cul rest dal di, ingio ch’eu sun activa, suvent occupada culs bsögns dals oters e stübg che ch’eu n’ha da far sco prossem, suna in quist mumaint be pro mai. Quels desch minuts a bunura sun quels ingio ch’eu nu stögl müdar nüglia, eu poss be esser.

Cun quists impissamaints m’inaccordscha cha alch simil capita eir dürant ils rituals d’advent. Ma impè dad esser suletta, gioda il mumaint cun oters. I’m dà ün sentimaint da recugnuschentscha ed eu til poss partir. Quai vala amo daplü. Cura vaina quai uschigliö aint il minchadi? – Plü co facil massa pac.

Eu bavarà inavant meis cafè da bunura in plaina quietezza, ma davent dad uossa, forsa eir jent üna jada o tschella cun inchün oter.