Fieras stretgas e pettas schetgas

Ils 8 da december, in firau en Austria, van ins a Vienna tradiziunalmein gl’emprem el Museum da Sisi, suenter a cumprar en el center dil marcau, e finescha lu il gi cun in punsch silla fiera da Nadal avon la ­casa communala, il «Wiener Christkindlmarkt am Rathaus». Silmeins era quei mi’impressiun avon treis onns, cu quei era miu program: Tut era fullanau cun glieud. Enstagl dallas rassas da Sisi vesevel el museum mo las giaccas da tschels visitaders; da far cumpras havess jeu duvrau cumbels pli ferms per saver contonscher la cassa; e sil punsch spetgel aunc adina.

Quei era miu emprem unviern a Vienna, e dapi lu haiel empriu cu ch’ins sa visitar ils loghens populars e cu ch’ins surlai els pli bugen als turists. Las fin d’jamnas d’advent s’audan tiel temps il pli visitau digl entir onn. Sch’ei croda grad aunc ensemen cul firau dils 8 da december, cura che las fatschentas ein aviartas e plein schenghetgs da Nadal ch’ins drova immediat, lu dat quei en summa ina massada carstgauns el center, mender che mintga nausch siemi d’in claustrofobic.

Pia entaup’ins mei buca pli sillas fieras popularas – e bialas! – avon la casa communala, la catedrala sogn Stiafen ni a Schönbrunn. Tuttina stossel buca renunziar sillas fieras da Nadal. Ei dat gie aunc tontas autras en gl’entir marcau. La davosa fin d’jamna haiel dumbrau 29 tocs, denter auter ina fiera da Nadal per tgauns, ina cun products mo biologics ed ina «all you can eat & drink».

Miu favorit persunal ei la fiera da Nadal egl «Altes AKH» ch’era pli baul il terren dal spital. In bellezia liug cun biaras plontas, glisch e tut quei che las grondas fieras han era, mo cun pli pauca glieud.

Deplorablamein ei mia PR buca buna avunda per nos hosps che vegnan dalla Svizra. Quels vulan tuttina tuts ir sillas fieras enconuschentas. In fenomen che jeu haiel observau gia tontas gadas. Per exempel getgel a mintga hosp ch’ei cunvegni buca dad ir el Café Sacher per migliar in toc tuorta da Sacher. Per l’ina ha il café nuot pli da far cun in ver café viennes; leu ein mo aunc turistas e turists che han cudischau in «slot» per saver far ina ­foti e metter sin Instagram. Per l’autra san ins migliar la tuorta da Sacher era en auters cafés, nua ch’ella gusta perfin aunc meglier. Clar, quella ei lu buc fatga tenor il recept original. Mo forsa han ins halt tuttina empriu vitier certas caussas dapi gl’onn 1832, aschia che las tuortas ein buca pli dil tut aschi schetgas sco l’original.

Mes hosps lain lu mintgamai finir mei mia tirada encunter las fallas turisticas, engrazian e van lu el marcau – pli u meins direct tiel Café Sacher. Perquei che senza quella viseta fuss ei tuttina buca stau in ver viadi a Vienna, ni buc?

Era mias amitgas svizras ch’eran sin viseta levan exnum ir sil «Christkindlmarkt». Quel enconuschi gl’entir mund, e da miu «Altes AKH» hagi gie aunc mai enzatgi udiu enzatgei. Pia essan nus idas tuttas ensemen silla fiera da Nadal avon la casa communala. La fin d’jamna. Las tschun e mesa. Schebein ch’ei era ferdaglia, havein nus gnanc buiu in punsch; ei veva bia memia biara glieud.

Denton las fotos ch’ellas han fatg eran bellezia.

Annatina Foppa da Favugn viva dapi 2022 cun sia famiglia a Vienna. Quest onn ha ella nizzegià il di dals 8 da december per avair ses paus a chasa e scriver ina columna.