«Empriu immens bia il temps dil surtrenament»

«La qualificaziun pil Cup mundial questa fin d’jamna a Tavau ei atgnamein buc ina surpresa per mei. Swiss Ski ha claras directivas da selecziun e tenor quellas hai jeu contonschiu la qualificaziun cul 13avel plaz alla cuorsa da 10 km da skating la dumengia vargada a Planica en Slovenia», di Cla-Ursin Nufer (24) ch’appartegn al cader C da cuorsa liunga da Swiss Ski. Leu han giu liug las cuorsas dil Cup Continental, suenter il Cup mundial – sch’ins vul dir aschia – la secunda ligia. Il 23avel rang haveva Cla-Ursin contonschiu il di avon a Planica. Cun in bien resultat eis el era returnaus dil Swiss Cup a S. Murezi la fin d’jamna avon, numnadamein il tschunavel. 

El ravugl dall’elita mundiala

Ils 12 da december 2021 ei Cla-Ursin Nufer partius l’emprema ga el Cup mundial. Era lezza ga ei quei stau a Tavau. In onn pli tard ha el saviu separticipar a duas cuorsas dil Tour de Ski en Val Müstair. Dumengia sa el danovamein semesirar cull’elita mundiala ella cuorsa da 10 km skating. Silla damonda tgei ch’el spetgi da sesez di Cla-Ursin Nufer: «Buca memia bia, sch’jeu sun sincers. Sin fundament dils resultats el Cup Continental e mia fuorma vegn jeu a serangar enzanua denter ils 60 ed 80. En emprema lingia less jeu guder quella cuorsa.»

Cup mundial avon casa

Dapi entgins onns viva Cla-Ursin Nufer agl ur dalla loipa a Tavau. Per quei motiv enconuscha el lu era fetg bein las relaziuns da cuorer leu. «Jeu hai aunc buca la fuorma ch’jeu less haver, mo jeu sesentel fetg bein il mument. Sch’ei va tut endretg, duess jeu haver la fuorma giavischada il schaner», di Cla-Ursin Nufer. Lu ei il Cup mundial sin viseta el Goms el cantun Valleis. Era per quellas cuorsas less il Tuatschin sequalificar: «Ei fuss ina premiera sch’jeu savess ir alla partenza dil Cup mundial en dus differents loghens il medem unviern.»

Luvrau vid la tecnica

Avon dus onns ei Cla-Ursin Nufer vegnius confruntaus cul surtrenament. Quel ha menau a difficultads cul tgierp ed aschia impediu el da separticipar a cuorsas gliez unviern. El decuors digl unviern vargau ei la situaziun semigliurada. «Questa primavera hai jeu aunc stuiu dar attenziun. La stad hai jeu denton trenau bein ed ussa sentel jeu nuot pli da quels simtoms dil surtrenament. En quei temps dil surtrenament ei sepurschiu a mi la caschun da luvrar vid mia tecnica. Pertuccont quella hai jeu fatg in grond pass anavon», di Cla-Ursin Nufer. Da quella fasa hagi el empriu enorm bia: «Mentalmein sun jeu ussa bia pli ferms. Jeu hai empriu d’enconuscher il tgierp ed ils signals che quel dat. Il tgierp muossa a mi cu el drova regeneraziun. Jeu pren era tut bia pli luc ch’avon, gaudel ils trenaments e las cuorsas.» En quei connex seigi era siu sentiment tactic semidaus: «Ussa sai jeu giudicar meglier con fetg ch’jeu astgel cuorer l’entschatta per tener atras bein ina cuorsa.»

Els top 5 dil Cup Continental

Tuttina di Cla-Ursin Nufer ch’ei carschius si en Val Tujetsch (mira era box): «Ei drova ussa aunc empau temps, avon ch’jeu hai la fuorma giavischada. Quella sai jeu contonscher per exempel cun intervals intensivs ni lu era ellas cuorsas.» El seigi spanegiaus sillas proximas concurrenzas dil Cup Continental: «Jeu sun optimists e manegiel ch’ei duessi esser pusseivel da serangar els top 5 da quellas.» La proxima caschun d’empruar da contonscher quella finamira seporscha la fin d’jamna dils 20 e 21 da december 2025 a St. Ulrich el Tirol.

Il trenader ei Toni Livers

Cla-Ursin Nufer trenescha a Tavau communablamein cun siu frar Fadri, ch’ei medemamein commember dil cader C da Swiss Ski. Lu trenader ei igl anteriur currider d’elita Toni Livers, oriunds da Trun. Spels trenaments e las cuorsas studegia Cla-Ursin Nufer il mument economia alla Scol’aulta professiunala Sviz/Lag da Turitg. Igl ei in studi ch’el sa far da casa anora.