Tractanda «santeri» ei buca satrada

En siu messadi per la radunonza communala haveva la suprastonza communala da Trin proponiu al suveran da buca revegnir alla decisiun dils 19 da mars 2025 e da realisar sco previu il project. Gievgia sera ha ina maioritad refusau quella proposta. La radunonza communala sforza cunquei la suprastonza da discutar aunc ina gada la restructuraziun planisada sil santeri da Trin.

Gievgia sera ha la radunonza communala da Trin giu da s’occupar – sper il preventiv e pei da taglia – cul santeri. Ils 5 da zercladur 2025 ha in comite da votantas e votants numnadamein inoltrau ina iniziativa che pretenda da revegnir alla decisiun dalla radunonza dils 19 da mars 2025. Quella haveva decidiu, cun 49 GIE, 43 NA e siat abstenziuns, da realisar ina restructuraziun sil santeri sper baselgia. Ina gruppa da lavur cun representantas e representas da pleiv, vischnaunca e cussegliaders externs haveva preparau in project per mauns dalla radunonza communala. Igl era previu d’engrondir la fossa communabla, d’adattar gl’access alla baselgia e da scaffir in spazi per sentupadas ed occurrenzas dalla pleiv. L’iniziativa cun 239 suttascripziuns ha pretendiu perencunter ch’il pastget el nord dalla baselgia dueigi restar verds e buca vegnir curclaus cun crappa e blocca. La radunonza communala dueigi, aschia l’iniziativa, revegnir alla decisiun e discutar aunc ina gada la mesira planisada sil santeri. Cun 100 GIE encunter 39 NA ha la radunonza communala decidiu per ina reponderaziun dil project sil santeri da Trin.

In tunnel sut il stradun digl Alpsu

La radunonza communala da Trin ha approbau plinavon in credit da 980’000 francs per in sutpassadi a Luiesta Sut. El liug che vegn era numnaus «Felsbach», datier dil cunfin culla vischnaunca da Flem, ei ina fermada digl auto da posta pil Lag la Cresta. Passagiers che vulan ir al lag ein sfurzai dad traversar il stradun. Il conclus da realisar quei project han ils da Trin priu cun 69 GIE e 56 NA. Tochen gl’atun 2026 duei in sutpassadi garantir la segirtad dallas persunas. La vischnaunca sa quintar cun contribuziuns da circa 400’000 francs per quella mesira a favur dil traffic plaun.

La radunonza communala ha plinavon decidiu da tener il pei da taglia sco dapi 2024 sin 95 % dalla taglia cantunala sempla. Cun gronda maioritad han ils 141 presents era approbau il preventiv 2026. Quel quenta cun expensas da 10,3 milliuns ed entradas da 10,1 milliuns francs cun in surpli d’expensas da biebein 200’000 francs.