Quen precaut pil 2026

Il preventiv communal da Sursaissa Mundaun quenta cun expensas da 14,1 ed entradas da 13,7 milliuns francs. El quen dallas investiziuns quenta la vischnaunca cun expensas nettas da 3,5 milliuns francs. Vendergis han las votantas ed ils votants priu notizia ch’ei setracta da projects da renovar, mantener e sanar vias ed autra infrastructura communala. Denter auter caschuna il pilotadi dalla serenera Valata cuosts dad in milliun francs. Ina summa da 300’000 francs vegn puspei reservada pil center da seniors Steinhauser. La radunonza communala ha approbau da renovar la cunvegna corrispundenta culla Fundaziun Steinhauser-Casanova. Quella duei valer tochen che la Reit da sanadad Surselva surpren, sco planisau sill’entschatta 2027, il menaschi ed il sectur dalla tgira.

Vinavon pei da taglia 95 %

Per saver ademplir las obligaziuns e saver funcziunar ei la vischnaunca dependenta dallas entradas da taglias e taxas. Ils da Sursaissa Mundaun han decidiu da schar il pei da taglia sco tochen dacheu sin 95 % dalla taglia cantunala sempla. Era la quota dalla taglia sin schischom resta sin 1,5 ‰.

La finala ha la radunonza communala da Sursaissa Mundaun stuiu prender posiziun pertuccont ina pendenza dalla scola. Sefundond silla lescha surordinada ha la vischnaunca stuiu actualisar gl’uorden da scola. Quel secumpona da 16 artechels, ina gronda part determinescha obligaziuns e cumpetenzas dalla cumissiun da scola. La radunonza communala ha approbau la revisiun da quei uorden.

Project «Sursaissa» a Cuort

Il project d’in center communal niev cun plaz-cadruvi e garascha sutterrana a Cuort/Meierhof s’avonza: La suprastonza communala ha presentau alla radunonza communala in credit per planisar ina surbaghegiada che duei revaletar il center dil vitg. La radunonza communala ha approbau il credit da planisaziun da 490’000 francs. Gl’atun 2023 haveva la vischnaunca organisau ina retscherca ed informau l’emprema gada surlunder. Ina studia preliminara haveva eruiu cuosts d’entuorn diesch milliuns francs. Il december 2024 ha la vischnaunca publicau ina concurrenza d’architects e retschiert 13 contribuziuns. Il matg 2025 ei ina giuria sedecidida pil project «Sursaissa». Quel e las autras propostas ha la suprastonza presentau in meins pli tard alla radunonza communala.

Ussa suonda la fasa da planisaziun. Il project elegiu «Sursaissa» secumpona d’in plaz-cadruvi cun fermada dils bus, garascha sutterana e center communal niev. Oriundamein era ei previu da renovar la casa dil Volg e da duvrar quella sco niev center communal. Ussa dueigi tuttina dar in baghetg niev per canzlia e biro turistic. Las localitads ella casa dil Volg – la vischnaunca ei conpossessura dall’immobiglia – duei survir sco spazi da habitar.