A Schluein, el casti da Clara
Jamie Sierra Sturzenegger, la menadra dalla scola da ballett el casti Löwenberg a Schluein, ha envidau sonda ad ina presentaziun speciala: Sis da sias saltunzas avanzadas han saltau solis ord il secund act dil «Nussknacker», in’ovra da Tschaikowski.
Liv Hörler ha saltau la part dalla tschugalata spagnola, Yuki Woodtli quella dil caffè arabic ed Alina Bearth la part dil te chines. Elena Casutt ha carmalau culs quadrels da caramel, Feliciana Müller cul marzipan tudestg e Lia Hossli sco diala da zucher. El studio da ballett a Schluein han quellas giuvnas saltau sis solos ord la praula «Der Nussknacker».
Las saltunzas en lur costums tarlischonts han interpretau in’ovra ch’il cumponist russ Piotr Illitsch Tschaikovski (1840-1893) ha scret per sault da ballett. Ella historia survegn la buobetta Clara in smaccanuschs sco schenghetg sut il pigniel. Quella sera da Nadal sedurmenta ella beada cun siu umet da lenn ed il siemi entscheiva: Ensemen cul smaccanuschs cumbatta ella il retg dils ratuns. Sin quei semida il smaccanuschs da lenn en in prenci viv. El accumpogna la buobetta el reginavel invernal ed ella tiara dallas dultscharias.
En lezza han las sis saltunzas menau – realmein – visitadras e visitaders. Saltond culla musica dil secund act dall’ovra da Tschaikovski havevan las sis ballerinas interpretau mintgamai ina dallas dultscharias. Gl’interessant ei suandaus suenter la producziun. El zulèr dalla tiarza alzada dil casti da Schluein havevan Judith e Marc Woodtli preparau in buffet cullas sis delicatessas che Clara haveva entupau el reginavel dallas dultscherias. Ina magnifica idea dalla scolasta da ballett Jamie Sierra Sturzenegger e sia squadra per ina producziun el temps d’advent.
Gust da leger dapli?