Pei da taglia resta sin 95 %

La radunonza communala dils 12 da december 2025 a Val S. Pieder ha approbau il preventiv 2026. Sco quei che la vischnaunca communichescha, han votantas e votants priu notizia d’in preventiv che quenta cun in gudogn schuber da biebein 73’200 francs, quei tier expensas da biebein 11,1 milliiuns ed entradas da 11,2 milliuns francs. La reducziun enviers gl’onn current seresulta d’entradas pli bassas per l’energia da participaziun. Il quen dallas investiziuns dalla vischnaunca preveda expensas nettas da 1,61 milliuns francs. Plinavon han ils da Val S. Pieder decidiu da restar tiel pei da taglia da 95 % dalla taglia cantunala sempla.

La radunonza ha plinavon approbau diversas damondas da credit. Ina summa da 120’000 francs ha ella concediu per in niev implont solar, ina serenera pintga sco era lavurs da sanaziun per la camona Hängela. Ei setracta d’in pign menaschi turistic en possess dalla vischnaunca. Plinavon ha ella approbau ina summa da 170’000 francs per lavurs da manteniment vid la via veglia da Leis ed era in credit supplementar da 70’000 francs pil project d’avertura digl ual Schgräienda. La damonda ei stada necessaria demai che la radunonza communala dils 8 da december 2023 haveva lubiu in credit da 559’000 francs.

Il november 2025 ha la suprastonza communala da Val S. Pieder inoltrau ina candidatura per ina sessiun extra muros dil Cussegl Grond igl onn 2027. Per quei intent eis ei stau necessari da fixar in preventiv. La radunonza ha concediu persuenter in credit da 250’000 francs. La finala ha la radunonza approbau per mauns dalla radunonza all’urna ina revisiun digl uorden da scola. Naven digl onn da scola 2026/27 ein dus onns da scoletta buca pli facultativs, mobein ein part dalla scola popolara. Quei munta ch’il temps da scola s’augmenta sin in obligatori da nov sin endisch onns.