Il «pli aut da Domat» vegn dal Center

Per rumantsch e tudestg ha salidà la presidenta dal cussegl communal da Domat, Luna Weggler (PS) sonda suentermezdi era particularmain blers giasts a l’ultima sesida da quest onn.  In’impurtanta tractanda eran las elecziuns dal presidi per l’onn 2026.  Per la partida Allianza dal Center è vegnì proponì il vicepresident actual Patrick Bargetzi. Ils preschents l’han elegì unanimamain. Bargetzi ch’è vischin da Domat è creschì si biling, rumantsch e tudestg. El sa participescha gia dapi onns a las activitads da las societads culturalas da la vischnanca. Da professiun è el actualmain manader da sectur spezial tar l’Uffizi da construcziun bassa e president local da sia partida. Sco vicepresident dal cussegl communal per l’onn 2026 è vegnì proponì da la PPS Stefan Theus, manader da l’administraziun finanziala e commember da la cumissiun da gestiun. Er el è vegnì elegì unanimamain. Quai signifitga ch’ins sa stimia vicendaivlamain, malgrà las differenzas politicas. 

Approvà credit supplementar per «Residenza Ensemen»

Sco affar politic ha la suprastanza communala suttamess in credit supplementar per las abitaziuns per persunas attempadas «Residenza Ensemen». Las votantas e votants avevan acceptà da l’onn 2022 in credit per l’object da 10,680 milliuns francs. La prognosa actuala dals custs fa quint cun custs supplementars da 2,020 milliuns francs. Essend che la differenza dal credit oriund surpassa il cunfin da toleranza da 15 % era daventà necessari da dumandar al cussegl communal in credit superiur. Quel sa munta a 400 000 francs, quai ch’importia radund 50 % da la chareschia che vegnida tiers, ha declerà il president communal Erich Kohler.

Pledaders da las fracziuns han salidà l’intent impurtant da la «Residenza Ensemen» cun abitaziuns per persunas attempadas, archiv cultural e restaurant sco lieu da sentupada. Ch’il project saja persistent, raschunaivel e vegnia giavischà da la populaziun, èsi vegnì ditg da vart dal Center, PS  e PLD. La PPS ha punctuà ch’ella saja per l’intent, ha dentant crititgà ils custs supplementars e las calculaziuns dals custs che sajan memia pauc exactas. Ma per evitar uss donns pli gronds vegnia era la PPS ad approvar il credit. Uschia è il credit supplementar vegnì acceptà cun 15:0 vuschs.

Recertifitgà cun success il label «Citad d’energia»

L’onn 2017 è la vischnanca da Domat vegnida certifitgada sco «Citad d’energia». Dapi quella giada porta ella il label che stat per ina politica d’energia communala persistenta. Quella giada aveva la vischnanca cuntanschì 62 % dals puncts pussaivels. Il resultat actual dal 2025 mussa in augment sin 71 %. L’ambassadur dal «Societad purtadra Citad d’energia», Heinz Wiher, ha ludà la vischnanca per lur engaschament encurunà cun success e rendì attent als progress considerabels.

Per finir la sesida ha il president communal Erich Kohler dà cumià al rapportader da la LQ en pensiun. Cun applaus l’ha Erich Kohler engrazià per sia lavur e’l surdà in regal.