Bumbardada da dumondas

Chalirada ed agitada è la discussiun gia ussa pertutgant il pachet dals novs contracts tranter la Svizra e la Uniun europeica (UE). E la debatta surlonder en il Parlament federal n’ha gea anc gnanc cumenzà. Magdalena Martullo-Blocher na po dentant spetgar. Il glindesdi ha la cussegliera naziunala pretendì pled e fatg en l’ura da dumondas. Ella ha inoltrà gist ina entira seria da dumondas – trais davart mangiativas e tschintg davart la recepziun dal dretg da l’UE en Svizra.

Tge vala per butias da bains purils?

Butias da bains purils valian en l’UE sco «Food Business Operator», ha constatà Magdalena Martullo-Blocher en ina da sias dumondas inoltradas a scrit. Talas butias sajan obligadas da declerar allergens e dad etichettar lur mangiativas tenor las directivas da l’UE. «Pertge di Michael Beer, vicedirectur da l’Uffizi federal per segirezza alimentara e veterinara (USAV), lura ch’i na sa midia nagut per questas butias?», ha dumandà la cussegliera naziunala da la PPS.

Cura sto la Svizra surpigliar dretg da l’UE?

Irritaziuns chaschunan las bilateralas III cunzunt areguard la dumonda, quant lunsch che la Svizra sto surpigliar dretg da l’UE. Magda­lena Martullo-Blocher ha vulì savair precis en tge cas che la Svizra stuess surpigliar dretg da l’UE cun las bilateralas III.

Sche la Svizra surpiglia dretg da l’UE, vegn quest dretg integrà en las leschas svizras. Quai sa numna «metoda d’integraziun». En ina dumonda ha la politicra da la PPS dentant fatg attent che la cumissiun da l’UE haja ditg ch’i valia en tscherts champs era la «metoda d’equivalenza». Cun lezza metoda vegn il dretg da l’UE surpiglià senza l’integrar en las leschas svizras. «È quai vair?», ha la cussegliera naziunala dumandà. «E co po il pievel lura votar da surpigliar ina nova regla da l’UE, sch’i na dat davart questa regla gnanc ina disposiziun svizra pli?»

170 dumondas – e respostas a scrit

Per l’ura da dumondas dal glindesdi èn 170 dumondas vegnidas inoltradas. In’ura na basta sa chapescha betg per respunder tuttas dumondas. Il Cussegl federal ha perquai respundì la gronda part en scrit – era a las dumondas da la cussegliera naziunala grischuna.

En tge champs che las bilateralas III valian, saja definì exact en ils singuls contracts dal pachet tranter la Svizra e l’UE, ha respundì il Cussegl federal: «Tuts relevants relaschs da l’UE vegnan enumerads explicitamain.» Relaschs che na vegnian betg enumerads, na vegnian betg applitgads en Svizra. Novs relaschs da l’UE che pertutgian las bilateralas III vegnian l’emprim tractads en il comité maschadà – per tudestg «gemischter Ausschuss» – cun represchentants da la Svizra e da l’UE.

Sch’i cumpetia al parlament federal da decider, schebain il nov relasch da l’UE vegnia surpiglià, «po la decisiun dal comité ir en vigur pir, suenter ch’il parlament e – en cas d’in referendum – il pievel han dà il consentiment», stat scrit en ina da las respostas dal Cussegl federal a Magdalena Martullo-Blocher. Gliez valia tant tar la metoda d’equivalenza sco era tar la metoda dad integraziun.

Gia oz il medem dretg da victualias

Butias da bains purils stoppian gia oz sa tegnair a las prescripziuns dal dretg da victualias, ha respundì il Cussegl federal a las dumondas tar mangiativas. Era allergens stoppian per exempel vegnir declerads. En quest reguard correspundia il dretg svizzer gia a quel da l’UE. Per butias da bains purils na sa midia nagut cun las bilateralas III. Era uschiglio vegnia il dretg da victualias svizzer gia oz armonisà regularmain cun quel da l’UE, stat scrit en la resposta. Uschia cuntanschian ins la medema protecziun per consumentas e consuments en tuts pajais vischins. En pli reduceschian ins barrieras da commerzi.