Skiùnzas da Schons a lur amprema cursa internaziunala
La fegn d’eanda ân gieu liac duas cursas da skis agl rom da las cumpetiziùns interalpinas da l’ARGE Alp agl Stubaital agl Tirol. Quegl e sto egna bùna ocasiùn pigls da Schons da rimnar experienztgas segl livel internaziunal.
La Cuminànza da lavur da las regiùns alpinas (ARGE Alp) cunsista da 10 regiùns alpinas da la Svizra, l’Austria, la Tearatudestga a da l’Itaglia. Ella e vagnida fundada igls 1972 agl Tirol, parquegl ca la politica digls pajis alpins eara vagnida partschearta, ca las consequenzas digl svilup economic, ambiaintal a sozial safearmian betg segls cunfegns statals. La fegnamira da quell’organisaziùn interstatala e’gl peia da schliear cuminevlameing problems cuminevels. L’ARGE Alp â var diesch tgomps d’activitad. Egn da quels e igl sport par giuvenils. Quel cumpeglia otg diferaints sports. Par mintga sparta sportiva dat igl egna concurenza trànter igls antschies partenaris. Da stad e quegl burape, sanudar, saragatar, cursa d’orientaziùn, atletica leava a sagitar, a d’unviern vean cumpatieu an hockey ad ir cun skis. La partiziùn digl sport magna Sport Grischùn, c’â igl mandat d’organisar las ocurenzas da sport. An mintgegna da las otg disziplegnas dat igl cumpetiziùns. Igls victurs remnan puncts par lur regiùn. Las ezas vignan rangadas an la classificaziùn finala.
Da far part e sto igl ple impurtànt
Par las cursas da skis dastga mintga regiùn cumembra tarmeter otg skiùnzas ad otg skiùnzs. Quels ân gl’amprem da saqualifitgear segl livel regiunal. Quest on ân saqualifitgieu quater giuvenils da l’Uniùn da sport Tumpriv, numnadameing Mauro Pitsch (Andeer), Valentina Borsotto (Mesocco), Ladina Derungs (Donat) a Jara Lou Michael (Casti).
La sonda passada âni gieu da samasirar agl Stubaital cun bundànt 60 concurentas a concurents agl slalom gigànt. Lez e vagnieu dumagnieu digls mats a matas tiroles. La victorgia digl slalom feminin da dumeingia e ear ida ad egn’Austriaca. Mo la savunda e davantada Vivienne Oehy da Flem. Robin Pingera da San Muerzi â cuntanschieu igl tearz post digl slalom masculin. Las matas da l’US Tumpriv, duas da l’anada 2011, ân tutaveia musso prestaziùns cuntantevlas, cumbagn c’ellas ân gieu da concurer cun skiùnzas ple viglias. «Nus eassan tuts cuntaints cugls noss resultats», gi Beni Michael da Casti c’â acumpagnieu la squadra da Schons. «An la rangaziùn en igls noss ànc betga davànttier. Mo quegl e sto lur amprema cursa internaziunala. A par ellas e’gl sto ple impurtànt da rimnar experienztgas. Pigls giuvenils e’gl anzuma sto egna bùn’ocasiùn da sacatar cun oters da la madema vigliadetga.»
Igl on proxim ân liac quellas cursas da skis da l’ARGE Alp a Samignùn.
Gust da leger dapli?