2 minutas e 53 secundas

Tgi che lavura en in uffeci el sectur da sanadad, enconuscha quels muments tut specials. Situaziuns che tuccan propi profundamein. Entupadas ­nunemblideivlas sco quella dad oz.

A la riva dil Lag da Turitg lavurel jeu en in center da tgira che porscha in dacasa a 130 habitontas e habitonts. Muort munconza da persunal da tgira ei il mintgadi stedi accumpignaus da gronda hectica. Jeu sai buca contas ga ch’jeu consoleschel enzatgi ed empermettel da vegnir pli tard puspei. Quei che constat buc adina. Ed jeu sun magari malcuntenta da buca saver passentar dapli temps tier in carstgaun che druvass exact quei – temps.

Tier ina cussadenta attempada midel jeu regularmein la fascha dad ina plaga ualti gronda. Igl ei ina lavur pretensiusa che pretenda bia pazienzia – dad omisduas. Suenter haver finiu miu pensum e mess puspei tut en siu uorden, damondel jeu la cussadenta sch’ella drovi forsa aunc enzatgei.

Sia risposta ei ida a mi sut la pial.

«Jeu hai buca pli mal, las faschas ein novas ed atgnamein drovel jeu nuot. Mo ei fuss bi sche Vus savessas star in mument tier mei. Semplamein aschia», di dunna S. tut bufatg.

Jeu stauschel il carret cun en las faschadiras dalla vart. La dunna attempada ch’ei quasi adina da buna luna di ch’jeu dueigi seser. Ella giavischassi da tedlar ina canzun da Beethoven. Il disc cumpact ei gia pinaus ed jeu smacchel «play». Ei sgara empau e lu suonda ina musica instrumentala fetg fina. La cussadenta schai en siu letg ed jeu sesel dasperas. Cun in’egliada carina mira ella sin mei. Aschia sesin nus 2 minutas e 53 secundas tedlond la melodia. La canzun va a fin. Dunna S. para fetg relaxada e tila profund il flad. Ella engrazia per quei mument e di che quei hagi fatg bein ad ella. «Engraziel medemamein», rispundel jeu.

Forsa havein nus omisduas duvrau gest quei bi e bien mument.

Madleina Manetsch lavura sco ­responsabla per la furmaziun professiunala en in center da sanadad a Männedorf. Ella è mamma e viva cun sia famiglia al Lai da Turitg.