Per la 21avla ga «art e sentupada»

L’exposiziun d’art ed artisanadi ella casa da scola ei in dils eveniments principals digl onn a Segnas. Per la 21avla ga vegn ella arranschada uonn dil Chor baselgia Segnas. Che l’exposiziun porta il tetel «art e sentupada» ei buca ina casualitad. Ella ha igl intent da porscher treis dis da sescuntrar da glieud dalunsch e damaneivel. Mo lu era la pusseivladad d’exponer a persunas dalla regiun che fan lavurs extraordinarias e particularas. Quellas havessen schiglioc buca la caschun da mussar ils resultats da lur duns. Uonn stattan maletgs, fotografias e differentas creaziuns el center dall’exposiziun. Da veser ein las lavurs da sis persunas: Laurenzia Cajacob, Leo Condrau, Anna Maria Fry, Simona Hendry e Luzia Jacomet-Frey. Da veser ein naturalmein era ovras da Linus Flepp che ha siu atelier ella casa da scola a Segnas. (fmr/hh)

L’exposiziun ei aviarta dumengia, ils 21 da december 2025, da s. Stiafen, venderdis, ils 26 da december 2025 e dumengia, ils 28 da december 2025 mintgamai dallas 14.00 entochen las 18.00. Ei vegn purschiu ina stiva da caffè.