Da nov en sarvetsch da tgesa dalla posta

Scu ancunaschaint sera la buteia Prima a Sur alla fegn da december las sias portas. Mano è chel negozi digl li nia igls davos onns dalla Societad da consum Alvra/Surses. Per muteivs finanzials ed er economics ò la societad gia da piglier chella decisiun cun la buteia Prima esser deficitara.

Cun la buteia sera er la posta

Integro aint igl negozi è er stada igls davos onns ena filiala da La Posta. Cun sarar la buteia Prima a la fegn digl onn totga er la filiala da La Posta a Sur tigl passo. A parteir digls 5 da schaner 2026 porscha La Posta agls abitants ed allas abitantas da Sur igl sarvetsch da tgesa. Cotras pon clients e clientas far lour fatschentas da posta ed igls paiamaints directamaintg ve digl isch-tgesa cugl pot u cun la pota. La tgascha da brevs existenta a Sur vign spustada levamaintg aval e sa catta da nov gio siva digls 18 da december 2025 tigl spartaveias dalla Veia principala tar la plazza da rimnada.

Igl sarvetsch da tgesa è en model da La Posta tg’è sa cumprovo ed ena purscheida stimada, dalla quala fon passa en mez milliun casadas an Svizra diever. Digl glindesde anfignen igl venderde pon igls clients e las clientas tarmetter brevs, dar giu pachets, pustar marcas u far paiamaints cun daner blot directamaintg tigl pot u tar la pota. La Posta vign anc ad infurmar la populaziun da Sur e mintga abitant e mintga abitanta retscheva er ena brev persunala davart l’offerta ed igl proceder digl sarvetsch da tgesa.