An ples gros en gudogn

Bler travagl la davosa fegn d’emda aint igl quartier Grava a Savognin. La raschung persiva è sto igl de dallas portas avertas dalla Tgesa Romana, tgi sa preschainta siva d’ena midada interna ed externa an en vistgia da festa. Ena reconstrucziun reuscheida. Siva da set meis lavour è davanto or dalla Tgesa Romana en veir «bischu». Chel è betg angal en gudogn per la gastronomia, mabagn er per Savognin e per l’antiera regiun. Da gronda valour è er tgi igls hospitants, igls proprietaris ed investours èn persungas indigenas. Sascha Gruber, igl investour principal ò detg: «La reconstrucziun, sanaziun e midada on propi custo fitg bler.» La somma d’investiziun ò el dantant betg lia numnar. Tg’è betg nia spargnea, tg’è betg nia biagia e construia bunmartgea dat dalunga an îgl cun eir tras l’antiera tgesa.

Sascha Gruber ò er managea: «Igl è en project da famiglia per famiglias.» Cun blera passiun e cun bler tschaffen on igls fardagliuns Sascha Gruber, Mirco Gruber e Daliah Steiner-Gruber catto igl dretg concept per far or dalla Tgesa Romana ena tga singulara ed en project tgi vess strousch savia neir realiso pi bagn. Igl taimp da localitads pi stgeiras totga aint igl Hotel Tgesa Romana propi agl passo.

Treis parts e tuttegna è tot survisibel

Decennis è igl Allegra, la pizzaria dalla Tgesa Romano, sto en local rustical noua tgi blers indigens e blers giasts èn ias aint ed or – er anc siva mesanotg. Siva dalla reconstrucziun dalla Tgesa Romana dattigl betg ple igl Allegra. Chel era en local tgi sumigliva pitost ad ena tigia u perfign ad en’acla. La pizzaria era separada digl restorant e veva schizont en’atgna antrada. Cugls davos set meis far la midada gronda è nia fatg or da dus localitads en restorant.

Er schi dat ainten chel restorants treis partiziuns, è pigl persunal ed er pigls giasts tot survisibel. Anmez igl restorant sa catta ena bar u teca tg’è ensacu significanta per cuminanza e per amicabladad. Doris Ambühl tg’è stada responsabla per dar agl restorant igl dretg dessegn, ò procuro tgi mantga strousch en sulet detagl. Igl bler lenn dat agl restorant en agen caracter ed en maletg plaschevel, uscheia tg’ins sa catta dalunga bagn. Las pareis d’en verdign mievel èn er ena anritgeida digl nov restorant cun total 100 plazs.

Sascha Gruber ò detg tgi las interpresas vegian fatg fitg bunga lavour. El ò cunzont ludo igls menaschis indigens tg’on luvro cun blera passiun. Menziunar ins dastga per exaimpel la Scrinareia Arpagaus da Savognin cugl patrung Mitgel Arpagaus e sies collaboratours. Els on tranter oter er fatg las lavours da lenn digl nov restorant.

Da nov sa catta la cuschigna digl Hotel Tgesa Romana betg ple aint igl amprem plang, mabagn aint igl partera scu igl restorant er. Chegl seia igls sies paradis, ò menziuno Mirco Gruber tgi segna per las speisas e tratgas excellentas cun esser en cuschinier da vaglia. L’antiera administraziun schea tar Daliah Steiner-Gruber, damai er ella ena part digl menaschi da famiglia. Las seis abitaziuns tgi ramplazzan las tgombras èn commerzialisadas e vignan dadas a fit per far vacanzas.

Blers e bungs vegns

Sa tgapescha tgi aint igl Hotel Tgesa Romana dattigl anc adegna pizzas scu anfignen ossa. La schelta è fitg gronda. Per ameis da bungs tocs tgern dattigl angal igl migler digl migler, e chegl grillo gist agl li. La carta da vegn è en veir semi per tot las persungas tgi gioldan en bung got. Fitg gronda è la collecziun da vegns grischuns, vegns digls pi ancunaschaints vignerols scu Gantenbein, Grendelmeier, Marugg, von Tscharner ed anc blers oters. Veirs scazis èn alloura igl vegns taliangs, chegl tg’ins dastga er deir digls vegns spagnols.

Cun ena tscherta luschezza ò Sascha Gruber musso igl sies local preferia aint igl Hotel Tgesa Romana: igl schler da vegn. 200 vegns schean ainten igls regals. Ensacu è igl schler da vegn igl «cor» digl Hotel Tgesa Romana. Cun tratgas exquisitas dastga er betg mantger en vegn exquisit e gist chels vignan er sarvias, vegns per en prietsch modest e vegns per en prietsch tgi a Son Murezza e conturn costan gist igl dobel scu aint igl restorant dalla Tgesa Romana.

Bettina Gruber magna la Bar Palaver

Ena nova positiva è tgi Bettina Gruber, la donna da Mirco Gruber, magna igl anviern 2025/26 la Bar Palaver a Savognin. I fiss sto fitg donn, fiss chella bar stada sarada, vess ella mantgea ad indigens ed er a giasts. Savognin vess an mintga cass pers a qualitad. La Bar Palaver è ena localitad ampernevla, noua tg’ins sa catta dalunga datgesa, passainta gist varsaquantas ouras an cumpagneia e noua tgi dat da tottas sorts bavrondas, drinks spezials, vegns tgi gostan e piculezzas da magler. Bettina Gruber magna la Bar Palaver e vign sustigneida digl barman Stefan, en om digl rom e cun experientscha.