Lectura Rumantscha

Adumbatten fatg lotto per finanziar il festival

Ils organisaturs han empruvà tut: midà num, data e stil da musica. Adumbatten! Il festival da musica Indoor Sounds a Mustér è suenter 13 ediziuns istorgia. Las visitadras ed ils visitaders mancavan e cun quels er ils daners. Ils organisaturs han schizunt organisà in lotto per finanziar il festival. Quai na sappia dentant betg esser ch’ins stoppia cuvrir il deficit d’in event cun organisar in auter, di Florian Zanin dal comité d’organisaziun dal Indoor Sounds.

«La lingua rumantscha vegniss indeblida»

Ils 8 da mars 2026 votescha la Svizra davart l’iniziativa «200 francs bastan» da la PPS. L’emna passada è vegnida lantschada la campagna cunter quella iniziativa che vul sbassar las taxas da medias sin 200 francs. Era l’uniun purtadra dad RTR, la SRG.R, sa dosta cunter quella iniziativa. Ses president Vincent Augustin declera en in’intervista tge ch’in GEA a l’urna muntass: «Ina rapportaziun largia en tut las quatter linguas naziunalas na fiss betg pli pussaivla cun ina tala reducziun.» E quai avess era consequenzas per la lingua e la cultura rumantscha che vegnissan tenor el indeblidas marcantamain.

Local da sentupada enstagl ustaria

Datti anc in’ustaria en tes vitg? U nua t’inscuntras ti per dar ina baterlada cun ils vischins? A Cumbel en Lumnezia è quai grev. La davosa ustaria ha serrà avant dapli ch’in onn. Ussa vulan Martina ed Andreas Leupin pussibilitar da nov a la populaziun da Cumbel inscunters en l’anteriura Ustria dalla Posta che ha serrà gia l’onn 1989. La chasa, nua ch’ils Leupins abiteschan era, na duai dentant betg daventar puspè in restaurant, mabain esser local per sentupadas a partir da la fin da schaner.

A revair e bun divertiment cun la Lectura Rumantscha!