S’entupar e sedivertir ella Posta veglia

Ils 17 da schaner 2026 envidan Martina ed Andreas Leupin, dapi 2021 ils possessurs dalla casa Posta veglia a Cumbel, ad in di dallas portas aviartas el local da sentupada Posta veglia. Ei setracta dall’anteriura ustria dalla Posta ch’ei vegnida serrada igl onn 1989. Naven dalla fin da schaner ei il local aviarts mintgamai la gievgia suentermiezdi dallas 14.00–17.00 e mintg’auter venderdis dallas 14.00–18.00. Tenor Martina Leupin seigi la gievgia suentermiezdi dedicada al giug da troccas ed ad auters giugs. Il venderdis prevedi ins da far ina stiva da caffè ed encunter sera ina meisa canorta.

Liug d’inscunter

«Nus vulessan era possiblitar in liug da sentupada per persunas da lungatg romontsch e tudestg. Miu consort va en pensiun igl onn proxim ed el ha previu d’emprender romontsch naven da lu», di Martina Leupin. Igl onn da corona 2021 ha la famiglia Leupin cumprau igl edifeci dalla Posta veglia da Pius Elvedi, igl anteriur posttenent da Cumbel. El habitava en casa ed ha pli tard priu dimora a Glion. Sco la possessura di, hagien els renovau las habitaziuns. La casa cumpegli sper il plaunterren cun l’ustria aunc duas habitaziuns e duas combras singulas ch’ins sappi prender a tscheins. «Ina habitaziun affittein nus a hosps da vacanzas ed ina duvrein nus mezs. Jeu vuless dir che quella casa ei in siemi per nus. E cheu a Cumbel essan nus vegni acceptai fetg spert e fetg bein dalla poulaziun indigena.»

Arver in’ustria ei negin tema

Martina Leupin di enviers la FMR ch’els seigien vegni dumandai da differentas varts, sch’els veglien buca puspei arver la Posta veglia sco restaurant a Cumbel. «Far ils ustiers ei negin tema, perquei che nus habitein aunc el cantun Argovia. Mo nus vulessan metter a disposiziun las localitads dall’anteriura ustria.» Il basegns per in liug da sentupada seigi vegnius aunc pli gronds ussa suenter che la davosa ustria, il Larisch hagi serrau sias portas. «Nus havein in fegl che ha frequentau la scola da hotellaria. Nus havessen bugen mess a disposiziun l’ustria ad el. Mo ad interim ha el cattau ina nova sfida professiunala.»

Tscheins mudests

Il local da sentupada Posta veglia duei tenor Martina Leupin saver vegnir duvraus gratuitamein dallas persunas ni d’uniuns che drovan la localitad per la cuminonza. Dallas fatschentas ni persunas che drovan las localitads per intents cun gudogns pretenden els in tscheins mudest. Culs daners ch’els incasseschien quentien els da saver curclar ils cuosts, di la proprietaria. «Nus essan buca avisai da far profit cun l’anteriura Posta veglia. Mo nus vulessan prestar enzatgei per la vischnaunca e sia populaziun.» E vinavon di ella: «Nus essan fetg bugen ella Val Lumnezia.» Il local da sentupada duei vegnir tgiraus da pliras persunas indigenas. Per organisar il menaschi han ins era tscharniu in team d’organisaziun il davos venderdis sera.