Ina sumbriva che paisa

«Patria» sa numna il cudesch che jau As less cussegliar oz. Ma tge è patria? Il roman da Fernando Aramburu quinta da duas dunnas e da lur famiglias che han differentas opiniuns davart la significaziun da «patria». Bittori sesa sper la fossa da ses um Txato ch’era vegnì mazzà ventg onns avant da terrorists da l’ETA. Ella decida da turnar en la chasa nua ch’els abitavan da quel temp e scuvrir tge ch’igl era capità propi, pertge che lur famiglia era vegnida isolada dals auters. Cur che Bittori arriva en quella chasa èsi finì cun la quietezza en il vitg. Surtut la vischina Miren, pli baud sia megliera amia ed ussa mamma dad in figl ch’è sco terrorist en praschun, è alarmada. Ch’il figl da Miren pudess avair gì da far insatge cun la mort da ses um è il pli grond quità da Bittori. Las duas dunnas van ord via l’ina a l’autra. Ma in di na sa lascha quel inscunter betg pli evitar… Il raquint gioga en il territori basc tranter la Spogna e la Frantscha. L’autur lascha quintar da las vitas da las duas famiglias da Bittori e Miren. L’attentat e la mort da Txato influenzescha era suenter tants onns anc lur pensar e sentir. Il cudesch tematisescha a moda commoventa ils differents aspects dal cumbat armà per la libertad dal pievel basc ord vista subjectiva dals confamigliars da victima e terrorist. L’autur Fernando Aramburu ha studegià filologia spagnola a Saragossa e viva dapi l’onn 1984 a Hannover. L’emprim fascheva el da magister da spagnol, dapi l’onn 2009 scriva el en sia nova patria cudeschs e contribuziuns per gasettas spagnolas.