Daners per la via ad Acla Mulin ch’ei reconstruida

La vischnaunca da Sumvitg quenta igl onn 2026 cun expensas da 9,3 milliuns francs. Suenter amortisaziuns da 366 000 francs duess resultar in surpli d’entradas da rodund 200 000 francs. Sco quei che la suprastonza communala scriva en ina communicaziun als mieds da massa, ein las investiziuns netto calculadas cun bunamein 4,5 milliuns francs. La radunonza communala ha acceptau il preventiv 2026 il mardis sera a Surrein. Ella ha decidiu da laschar il pei da taglia sin entradas e facultad sco entochen dacheu sin 105 % dalla taglia cantunala sempla ed il pei da taglia sin schischom sco tochen dacheu sin 1.3 ‰.

945 000 francs per la Via Val

La radunonza communala da Sumvitg ha approbau posteriuramein il project per la reconstrucziun dalla Via Val sil tschancun d’Acla Mulin. Persuenter ha ella concediu in credit da 945 000 francs. Ina part dil tschancun dalla via era sbuaus la fin da fenadur 2025. Consequentamein ha la via stuiu vegnir serrada per pli liung temps. Sco ins sa leger silla homepage dalla vischnaunca da Sumvitg ei il tschancun reparau aviarts per scadin traffic dapi ils 14 da november 2025.

Daners per vias ed aquaduct

Vischinas e vischins da Sumvitg han approbau il project per la sanaziun dalla Via Cavivens e concediu persuenter in credit da 902 000 francs. Medemamein han els approbau la sanaziun dallas lingias d’aua dalla Via Cavivens egl import da 256 000 francs. Plinavon ha la radunonza communala approbau il project per la construcziun d’in reservuar d’aua a Crest Ault e concediu il credit corrispundent da 472 000 francs. Per la cumpra d’in niev transporter communal han vischinas e vischins sbursau 251 000 francs.