«I manca la constanza»

«Entant na sun jau betg pli uschè agità avant las cursas», ha Silvano Demarmels ditg glindesdi envers la FMR. Il giuven biatlet oriund da Salouf è quest’emna a la partenza dad almain ina cursa da l’IBU Cup a Lai (guarda box). E quai è tuttavia insatge spezial per il biatlet dal cader C da Swiss Ski, malgrà ch’el è gia disà la tensiun avant talas concurrenzas. Per ­Silvano Demarmels èsi numnadamain la cursa «da chasa»: «Cunquai che la purschida da cursa lunga n’è betg uschè gronda en il Surses, sun jau entrà en il Club da cursa lunga Bual da Lantsch. E qua hai jau alura fufragnà en il sport da biatlon.»

Per il giuven sportist da 21 onns – ch’abitescha entant er a Lantsch – èsi en pli l’emprima cursa da l’IBU Cup en Svizra ed insumma l’emprima stagiun ch’el concurrenzescha cumplainamain en la segund auta categoria da biatlon professiunal. Singulas cursas en quella classa ha el dentant gia absolvì la stagiun passada.

Finamira: la cuppa mundiala

Sco puncts culminants da sia giuvna carriera numna Silvano Demarmels per il mument però anc cursas da la categoria da juniors, per exempel ils campiunadis mundials da juniors 2025 ad Östersund en Svezia. Là ha il team svizzer manchentà be per dudesch secundas ina medaglia ed ha stuì sa cuntentar cun il quart plaz. In segund plaz ha Silvano Demarmels dentant gia cuntanschì il 2021 en l’IBU Junior Cup, la pli auta categoria da biatlon da juniors. En il sprint a Martell en il Tirol dal Sid ha be il Polac Jan Gunka terminà la cursa pli spert – e quel concurrenzescha entant en la cuppa mundiala.

A lunga vista saja quai era sia finamira, ha Silvano Demarmels fatg a savair. Per il mument veglia el dentant far buns svilups en l’IBU Cup: «Da finir regularmain sut ils emprims 40 u 30 fiss bel e tenor mai era realistic, sche jau cuntansch mia furma usitada.» Quella manchia actualmain in pau e perquai è la finamira per quest’emna a Lai da finir il sprint da venderdi sut ils emprims 60. Quai muntass numnadamain la qualificaziun per la partenza da massa che ha alura lieu sonda, ils 20 da december.

En ina buna situaziun

«Potenzial da ma megliurar hai jau tant sin ils skis sco vi da la buis», ha Silvano Demarmels ditg sin la dumonda, tge ch’i manchia anc per cuntanscher las finamiras. Actualmain haja el dentant er in auter problem: «I manca la constanza.»

Da far quitads na saja dentant betg. Il giuven biatlet surmiran ha gust ed è en ina buna situaziun – era finanzialmain. El ha numnadamain in engaschament tar l’Uffizi federal da la duana e da la segirezza dals cunfins. Tar quel datti in program da promoziun per biatletas e biatlets professiunals, uschia il giuven sportist: «Quest onn hai jau fatg la scolaziun a Liestal e silsuenter lavur jau tut tenor mes program da biatlon. Jau ma chat damai en ina relativamain buna situaziun finanziala.»

La realitad è dentant era ch’i na va betg senza ambiziuns. Propi pausas haja el numnadamain paucas, uschia il giuven biatlet: «L’avrigl hai jau per il solit ina, duas emnas vacanzas dal sport.» Uschiglio saja adina da trenar en l’ina u l’autra furma – per cuntanscher las finamiras.