Glüsch verda pel proget solar a Samedan

Il proget solar alpin a Samedan ho ragiunt ün pass important: Il permiss da fabrica es uossa valabel ed ils partenaris dal proget haun fundo l’Energia Solara Engiadinaisa SA per fabricher e mantgnair il proget. Tenor la comunicaziun als mezs d’infurmaziun vegn que cumanzo a fabricher da prümavaira 2027.

Permiss da fabricher ed adattaziuns

Il permiss pel proget solar es gnieu do zieva cha’l proget d’eira gnieu optimo ed adatto a las pretaisas chantunelas. Duos parts da l’implaunt da la vart da l’ost haun stuvieu gnir strichos per motivs da sgürezza in cas da lavinas. Melgrô quistas müdedas dess la producziun d’energia rester sül medem nivel scu planiso.

Ils partenaris dal proget, traunter oter TNC Consulting AG ed Energia Samedan, haun fundo l’Energia Solara Engiadinaisa SA. Quista societed ho l’incumbenza da fabricher e gestiuner l’implaunt solar a Samedan. 

Auncha bgera lavur chi spetta

Fin cha l’implaunt po gnir fabricho do que auncha bgera lavur per l’Energia Solara Engiadinaisa SA. Las lavuors staun gnir scrittas oura e d’utuon dess que alura der la decisiun da fabricher dals partenaris. Tenor il president dal cussagl administrativ da la firma, Martin Merz, nun es quai brich 100% sgür: «Scha nus vains insembel ils raps per fabricher l’implaunt solar a Samedan, pudains decider, scha que vala la paina finanzielmaing da cumanzer.» Scha’ls cuosts offrieus da las firmas as mouvan i’l ram dals cuosts spettos da 40 fin 45 milliuns francs dess l’implaunt solar eir gnir fabricho. «Eau vez las schanzas uossa tar var 80%, cha nus cumainzan a fabricher ils panels solars già il prossem inviern e cha l’implaunt possa ir vi da la rait vers la fin dal 2027, tuot dependa uossa da las calculaziuns economicas», conclüda Martin Merz. Pünavaunt voul l’Energia Solara Engiadinaisa SA fer l’an chi vain la dumanda formela per survgnir üna contribuziun da promoziun da l’Uffizi federel per energia. Scha tuot vo tenor plan dess la prüma part da l’implaunt solar ir d’utuon 2027 vi da la rait.