40 onns bastan – la Serigrafia ei en novs mauns

Maja e Wendelin Hendry ein pensiunai dapi plirs onns, mo tuttina han els cuntinuau cun la Serigrafia a Sedrun. El decuors da quest onn ei lu sepresentada la pusseivladad da vender il menaschi. «Miu partenari Simon Fässler ed jeu havein contactau els e mussau nies interess concret da surprender il menaschi. Nus havein vuliu impedir ch’el siari e che quella purschida svaneschi», di Ursina Vinzens. Wendelin Hendry ei leds e cuntents ch’il menaschi ha ina cuntinuaziun. Aschia ei la vendita, respectivamein la cumpra dil menaschi semadirada e cugl emprem da december 2025 eis ella vegnida exequida.

Stamparia e serigrafia enina

Ursina Vinzens e Simon Fässler ein gia possessurs dalla Stamparia La Tuatschina. Schegie che la tecnica da serigrafar ei bein parentada cullas professiuns d’ina stamparia, eis ei tonaton in’autra lavur. La stamparia procura stampats sin pupi ni cartun, la serigrafia sin auters materials sco per exempel textilias. Consequentamein setracta ei lu era d’in cumpleinamein auter parc da maschinas. «Il menaschi resta ell’emprema alzada dalla casa dil Denner. Nus savessen denton s’imaginar d’integrar el en ina localitad culla stamparia ensemen. Persuenter maunca il mument denton il plaz. Sper quellas duas localitads cun maschinas havein nus era in magasin da pupi», di Ursina Vinzens che ha era giu il sustegn da sias collaboraturas e siu collaboratur da La Tuatschina enten prender quella decisiun. Ella occupa il mument tschun persunas, da quei treis en plazza cumpleina.

Cuntinuar sco tochen dacheu

La Serigrafia ei enconuschenta pils stampats sin textilias sco per exempel t-shirts ni tastgas. Mo lu era sin auters materials e formats sco taccaders, tablas, signalisaziuns, escha e finiastras ni sin autos. Ella ei endrizzada cun pliras maschinas specialas. «Cun quell’infrastructura essan nus ils sulets entochen Cuera. Per quei motiv havein nus era giu clientella dall’entira Surselva e per part era dalla Bassa», di Wendelin Hendry. Ursina Vinzens vesa las parallelas da siu menaschi da stamparia cun quella da serigrafia: «Omisdus menaschis lavuran graficamein ed omisdus fan en quei senn stampats. Alla clientella savein nus porscher ussa differents products ed aschia era nezegiar las sinergias. Nus savein surprender in menaschi che ha in bien num e quei ei onz pli sempel che da stuer baghegiar si in da funs ensi. Per nus ei quei in’interessanta cumbinaziun da fatschenta.»

En pliras localitads

La Serigrafia a Sedrun ei vegnida fundada 1984. Maja Hendry, la consorta da Wendelin Hendry, ha empriu da serigrafa ella «Siebdruckerei» Rümlang. Ils consorts han viu il potenzial per lur purschida. Il volumen d’incaricas ei carschius successivamein ed aschia ei Wendelin Hendry, che haveva empriu oriundamein da miradur, sedecidius igl onn 1991 da sustener sia consorta el menaschi. Igl emprem menaschi han els endrizzau ella Casa Friedrich da Maria Berther, silsuenter eis el vegnius translocaus ell’emprema alzada dalla casa dil Denner. Allura ha ei giu num midar casa. Suenter entgins onns ella casa dad Ernst Monn ei il menaschi lu puspei returnaus ella casa dil Denner nua ch’el sesanfla dapi rodund diesch onns.

Inschign e creativitad

«Il menaschi pretenda empau inschign e dun creativ. Impurtont eis ei da saver endrizzar las maschinas aschia ch’ellas san stampar schuber. Igl emprem havein nus stampau bia taccaders. Mintga fatschenta e biaras uniuns havevan taccaders. Lavurs cun textilias ein vegnidas vidlunder pli tard», seregordan Maja e Wendelin Hendry. Els vegnan a restar vinavon a disposiziun per instruir il persunal dalla Stamparia La Tuatschina che surpren ina nov’incarica cun autra tecnica. «Igl ei stau in interessant temps e nus essan engrazieivels a bia clientella che ha susteniu nus en quei temps», puntuescha Maja Hendry ch’ei carschida si el cantun Turitg.