Advent tutpresent ella brocki

Ils onns che las casas da brocki eran surtut loghens per giuvens che drizzavan en lur emprema habitaziun ed encurevan mobiglias favoreivlas da secondhand ein vargai. Oz meina la Brocki Fetschtland a Schluein ina stiziun sin duas alzadas ch’ei fetg tschercada da tuttas spartas societaras ch’ein alla tscherca da rauba sco per exempel mobiglias ni era utensils da decoraziun specials. Ils responsabels dalla brocki a Schluein havevan per exempel gia il mardis vargau vendiu ina gronda part da lur sortiment d’advent e Nadal. Louis Waser, il menader dalla brocki, di ch’igl interess per rauba da decoraziun da secondhand seigi dad onn tier onn pli e pli grond.

Social e persistent

Louis Waser declara la «raison d’être» dalla Brocki Feschtland: «Mintga cumpra ella Brocki Feschtland a Schluein ha ina plivalur sociala. Nossa fundaziun grischuna vegn purtada digl aspect social e dil tema persistenza. Brocki Feschtland emprova d’integrar ni da reintegrar el mund da lavur persunas ch’ein stadas en ina fasa dalla veta difficila. Plinavon empruein nus da contribuir alla persistenza cun vender products gia duvrai, mo ch’ein aunc en in bien stan.» Quels dus aspects seigien secumprovai, di Louis Waser. Tendenzialmein creschi igl interess da vegnir ella brocki per far cumissiuns ni era per furnir rauba da secondhand. «Oz ha nossa interpresa cun sias quater filialas a Cuera, Glion, Tavau e Landquart perfin agens luvratoris. A Cuera havein nus in luvratori da bike sco era luvratoris protegi da lenna, recicladi, d’industria e creativ.»

Mirar, smarvegliar e cumprar

Sch’ins entra quels dis ella stizun dalla Brocki Feschtland a Schluein resenta ins immediat ch’igl ei advent. L’exposiziun cun rauba da decoraziun da Nadal attrai immediatamein l’attenziun dallas clientas e dils clients. Ei vegn mirau, tschercau e smarvegliau. Ed ei vegn cumprau. Il clisché da localitads cun l’odur da rauba veglia stada deponida onns alla liunga els tschalers privats ei definitivamein ina fama. Cun bialas colurs e frestgamein spetgan ils products da secund maun sco scadiolas, ruclas, pullovers, figuras da termagls, decoraziuns e tschupials d’advent, mo era mobiglias ed auters products sin lur novs possessurs.

Ornaments specials

Fetg tschercai ella stizun dalla Brocki Feschtland a Schluein ein apparentamein ornaments specials pil pigniel da Nadal. In exempel seigien ruclas veglias da veider ni era figuras ch’ei detti oz buca pli e ch’ins pendevi pli baul vid il pigniel, di Louis Waser. «Tier nus catt’ins l’entira paletta da products da tuttas fatschentas. Sche vus meis en ina stizun convenziunala sco per exempel tier Ikea haveis vus mo la purschida da quella fatschenta.» Ultra da quei vegni fetg biara glieud ozildi ella brocki pervia dalla protecziun digl ambient, pia per far cumpras persistentas.

Esser promts

«Biars products da decoraziun e regals da Nadal ein gia vendi», declara Louis Waser, il menader dalla Brocki a Schluein. «Nus entschevein gia baul a pinar tier la rauba d’advent per gie esser semtgai il november cura che la clientella vegn.» El senn d’in bien clima da lavur detti el era peisa che las collaboraturas ed ils collaboraturs hagien bien in cun l’auter avon Nadal e ch’ei mondi bein cun els. «Alla fin finala vulein nus porscher in bien event da cumpra a nossas clientas ed a nos clients.» Per che quei succedi stoppi il team esser en gamba.

Da sissum tochen giudem

Ils furniturs da rauba da secondhand sco era las clientas ed ils clients che cumpran ella Brocki Feschtland a Schluein derivan tenor il gestiunari dall’entira Suselva naven da Mustér entochen Trin. «Nus havein denton era fetg biars hosps da vacanzas dalla Bassa che portan rauba a nus.» Il temps d’advent s’audi tier il menaschi dalla brocki a Schluein. Quei temps seigi denton buca d’impurtonza extrordinaria per la brocki sco interpresa, di Louis Waser: «Cun quei vuless jeu dir ch’ils ulteriurs secturs da nossa fatschenta muntan la gronda part da nossa sviulta.»

Igl image ei semidaus

Sco il meinafatschenta dalla brocki a Schluein di en discuors cun la FMR seigi igl image dallas fatschentas da brocki en general semidaus ils davos onns. «Pli baul mav’ins buca cun prioritad ella brocki per encurir enzatgei. Ei s’udeva da cumprar niev enstagl da secondhand.» E vinavon di Louis Waser: «Jeu creigel che la glieud seigi oz bia pli aviarta per cumprar products gia duvrai. E quei era per motivs dalla protecziun digl ambient. Nus a Schluein havein en mintga cass ina gronda clientella da tschep e quei era da persunas che tschercan per exempel mobiglias specialas.» Il medem vali era pils furniturs. Biaras e biars portien rauba ella brocki per sclarir, sch’ei sappi vegnir duvrau avon che dismetter. Per dir ei culs plaids da Louis Waser: «Nossa incumbensa ei da slargar il ciclus da veta da tut la rauba da diever. E tier quella s’auda secapescha era igl entir repertori d’advent e Nadal.»