An treis meis duess darveir la nova buteia

La situaziun da partenza è la suandonta: Digl 1963 anfignen igl 2004 ò La Societad da consum Alvra/Surses mano a Sur ena filiala digl Volg. Igl madem onn ò igl cumegn da Sur disdetg igl contract cun la societad, neida fundada è la cooperativa «Nossa buteia». Mano è igl negozi nia sen agen chint dalla cooperativa. Igl è adegna sto en cumbat permanent per star sur l’ava chegl tgi pertotga las finanzas.

Avant tschintg onns ò l’organisaziun «Nossa buteia» fatg la dumonda alla Societad da consum Alvra/Surses, sch’ella surpigless la buteia a Sur. La cundiziun è stada tgi igl cumegn da Surses surpeglia en deficit eventual dalla buteia. Chegl è alloura er sto igl cass cun screiver la buteia cefras cotschnas da radond 30 000 francs per onn. Igl cumegn da Surses è sa decidia aint igl decurs digl 2025 da betg ple surpiglier igl deficit. Uscheia è la Societad da consum Alvra/Surses neida a la conclusiun da sarar a la fegn da december 2025 la buteia Prima a Sur, chegl cun ella simplamaintg betg render ed er cun mantger avonda clients.

En flyer cun plessas dumondas

Gio dalla seira d’infurmaziun digl cumegn da Sur e dalla Societad da consum Alvra/Surses èn las emoziuns pertutgont la sarada dalla buteia a Sur sa mussadas an plessas furmas. Dalunga è er sa furmada ena gruppa d’interess per mantigneir la buteia cun plessas persungas indigenas scu per exaimpel Victoria Spinas, Gabriela Spinas, Letizia Signorell ed Erika Tanner. Er ferm angascheas pigl project èn Hansruedi Berger, Thomas Nyffeler e Werner Erb.

Siva da curt cursescha a Sur ed er ainten las vischnancas vaschignas en flyer cugl tetel «La buteia Sur». Per darveir schi vo tot tenor plan igl mars 2026 la buteia a Sur lessan iniziantas ed iniziants dalla gruppa d’interess canoscher l’opiniun dalla populaziun da Sur, da giasts e da sagonddimorants pertutgont igls products tgi duessan neir vandias ainten la nova buteia ed er tge products tgi dovra per ena buteia da vischnanca.

Fitg impurtant – dovrigl betg

Graztga agl questiunari duess esser pi simpel per la gruppa d’interess per mantigneir la buteia da vischnanca da cuntinuar cun la lavour e da persequitar venavant igl project. Da rasponder ò mintga participant e mintga participanta plessas dumondas. Tranter oter ins less saveir, sch’è fitg impurtant e sch’è bel d’aveir venavant ena buteia an vischnanca. Far ena crousch so alloura er mintgign tar la dumonda, dovrigl betg ena buteia u chegl am è tuttegna. Ultra da chegl dattigl plessas pussebladads per sa participar agl project ed alla realisaziun dalla nova buteia cun far donaziuns, investiziuns, gidar da sanar igl local ed er da luvrar an buteia eneda tgi chella è eventualmaintg puspe averta.

Chegl tgi pertotga igls products less la gruppa d’interess saveir tge products tgi totgan an ena buteia da vischnanca, tge roba tgi seia fitg necessaria, schi dastgan er betg mantger products frestgs ed anc blers oters. Ena dumonda è er, schi dovra products convenziunals, biologics, sainza lactosa, sainza gluten, vegetarians e vegans. Da gronda impurtanza seia betg angal d’aveir ena buteia an vischnanca, noua tgi mintgign ò la pussebladad da far las sias compras. Da gronda valour seia er d’aveir en li d’antop scu per exaimpel igl Bistro tgi totga gio ossa tar la buteia «Nossa buteia». Previa fiss d’aveir ena buteia tgi fiss averta durant 24 ouras e durant set deis, scu chegl tg’è er igl cass tar la nova buteia da vischnanca a Salouf. Pi spert tg’ins vegia igls resultats digl questiunari e dalla retschertga ins vigna ad infurmar la populaziun da Sur, screivan iniziantas ed iniziants digl project segl figl sgulont.