Ün stumpel finanzial a favur da la musica

La società da promoziun da la Scoula da musica Engiadina Bassa/Val Müstair (EBVM) es gnüda fundada als 26 schner 2011. La società ha il böt da sustgnair la scoula da musica finanzialmaing per progets ed arrandschamaints sco per exaimpel: eivnas d’evenimaints, concerts da gala, ün Cumün resuna, cumpritas dad instrumaints e pro’l sustegn social da famiglias. Tals evenimaints nu füssan pussibels sainza l’ingaschamaint da la società da promoziun chi inrichischa la sporta e promouva chant e musica illas duos regiuns. La società dombra actualmaing s-chars 60 commembras e commembers chi sustegnan cun lur contribuziuns annualas l’intent da la società. La società es dachasa illa Chasa du Parc a Scuol.

Ingrazchà a la società da promoziun

In seis rapport ha la presidenta da la Società da promoziun, Jolanda Andri chi abita a Zernez, orientà davart las occurrenzas chi han gnü lö dürant l’on: «In settember cumainzan las lecziuns da la scoula da musica, in december sun ils prüms concertins da classa, il concert da gala chi ha lö minch’on, concurrenza da musica daja eir, in gün Ün cumün resuna chi ha adüna lö in ün oter cumün, per nomnar be ün pêr dals arrandschamaints.»

Eir il manader da la Scoula da musica EBVM, Roberto Donchi ha ingrazchà a la società da promoziun, sainza la quala i nu füss pussibel dad organisar tuot ils arrandschamaints manzunats. Important pels uffants es adüna eir il concert da gala chi ha gnü lö in sonda passada illa baselgia da Fuldera ed il Chastè da cultura. Il rapport da quint es gnü preschantà da la presidenta: «No vain üna facultà da bundant 48 000 francs. Il chapital agen s’ha diminui ed importa s-chars 72 000 francs. Il quint annual cun entradas da 36 000 e sortidas da 39 800 francs serra cun üna perdita da var 3800 francs». Suot la tractanda elecziuns es gnü elet in suprastanza Georg Fallet per Vitus Malgiaritta chi ha demischiunà. El es gnü ingrazchà cun ün grond applaus.

Scoula da musica regiunala

La Scoula da musica EBVM es gnüda fundada dal 1976 ed ha il böt da promouver e sustgnair üna scolaziun extaisa per scolars e musicistas. Ella dombra 24 magistras e magisters e raduond 500 scolars in 12 differents lös d’instrucziun in tuot la regiun. La scoula vain manada da Roberto Donchi dal Vnuost e spordscha cuors fundamentals, instrucziuns singulas, instrucziuns in gruppas, ensembles, bands ed ün cor d’uffants e giuvenils. La Scoula da musica EBVM sta suot il tet da la Regiun Engiadina Bassa e Val Müstair.

50 ons scoula da musica

Sco cha Roberto Donchi ha infuormà han lö dal 2026 diversas occurrenzas a chaschun dal 50avel cumplion. Detagls davart il program survegnan las chasadas cun üna broschüra chi vain protramissa. L’evenimaint chaschuna cuosts da var 170 000 francs. Duos bels imports dad insembel 60 000 francs per quella festa sun fingià sgürats pel rest speran ils organisaturs da survgnir ulteriuras donaziuns.