In siemi da troccas

Dapi in pèr meins astgel jeu, cu jeu sun ad Andiast, accumpignar ina dunna a Pigniu per dar troccas. Jeu sesentel fetg honorada, perquei che miu partenari el giug da troccas sto haver massa pazienzia cun mei, l’entschevidra. Mo jeu mintgacass hai plascher, schebein ch’jeu sun futscha silsuenter, perquei ch’jeu hai stuiu seconcentrar uras ed uras …

E lu mon jeu a letg, ed enstagl da durmir pacific, cuntinueschel jeu – buca da smarvegliar – a dar troccas el siemi: Jeu mischeidel las cartas fetg bein e zun ditg, schebein ch’ins duess mischedar ellas mo levamein. Lu dun jeu ora ellas ed emblidel adina puspei da volver la davosa carta dils auters giugadurs e dallas autras giugaduras.

Scart – gie, scart fetsch jeu sc’in profi, aschia ch’jeu possi tier duront il giug ils retgs e las reginas cun mias troccas – mo jeu sai buca pli tgei far cul narr. Eis el era ina trocca?

Ed jeu tschontschel bunamein sc’in profi: nuot, strusch in, in tec da Medel … – Mo jeu stoi seconcentrar schi fetg ch’jeu sai buca seregurdar da quei ch’ils auters han detg …

Scumbigliar las spadas ed ils bastuns – na, per mei ei lur semeglientscha buca pli in problem, propi – jeu hai dau pér duas gadas la fallida colur. Ed jeu hai schau curdar mo in pèr gadas giun plaun las cartas. (Ins ha veramein memia biaras, seigies sincers …!)

Il dumbrar denton surlaschel jeu als auters. Sch’jeu stuess dumbrar, cuzzass quei ina perpetnadad: Ina regina ed in buob ensemen cun duas lecras fan sis, na, fan tschun puncts, ni buc?

Insumma havein miu partenari ed jeu aschia ni aschia bunamein mai schliats, vul dir, nus fagein il bia pli che la mesadad – mo tgei ei la mesadad gia puspei?

Gie, jeu dundel troccas en sien sc’in profi, e cu jeu vegnel neunavon la damaun, suenter haver semiau fetg confus, sun jeu tut stuorna e pli stauncla che avon ir a letg. Mo la sera, dad ir el Club da troccas da Pigniu, culs giugadurs che dattan quei giug dapi lur affonza, gliez vala tonaton la peina.

Johanna Krapf è lectora ed autura e viva e lavura a Rapperswil ed ­Andiast. Ella ha emprais sursilvan e sa fatschenta intensivamain cun quella lingua – e dal gieu da troccas.