Arranschament da Daniev cun discussiun davart la claustra
Tgei succeda culla claustra dallas soras dominicanas a Glion, mo era cun autras semegliontas immobilias? Da quella damonda sefatschenta il Program San Gottardo en ina discussiun publica gliendisdis, ils 12 da schaner 2026.
Ils baghetgs dalla claustra a Glion ein venals. Mo pli e pli bandunadas ein era autras immobilias sacralas sco baselgias e capluttas. Gliendisdis, ils 12 da schaner 2026 organisescha il Program San Gottardo (PSG) ina discussiun davart igl avegnir dil baghetg dalla claustra a Glion. Quella discussiun en rama d’in arranschament da Daniev entscheiva allas 17.00 ella claustra.
Igl avegnir dalla claustra da Glion
Sco quei ch’il PSG scriva en ina communicaziun allas medias, discussiuneschan cusseglier naziunal Martin Candinas, il meinafatschenta dalla Missiun svizra Urban Fink, il cau digl Uffeci per economia e traffic public dil cantun Uri Christian Raab e la substituta dalla priura generala dalla claustra dallas dominicanas da Glion, sora Monika Hüppi, davart igl avegnir dallas immobilias dalla claustra da Glion. Quella tematica fatschenti autras claustras e numerusas pleivs ella regiun dil Gottard. L’occurrenza porschi la pusseivladad da discuorer davart il tema communablamein cun persunalitads ed experts. La discussiun vegn menada dalla meinafatschenta dil Program San Gottardo, Nadja Germann. Igl arranschament ei publics, annunzias san vegnir fatgas per info@gottardo.ch ni 081 926 95 67. Visetas spontanas ein era beinvegnidas. (fmr/hh)
Gust da leger dapli?