Orchester ucrain cun ovras da differents cumponists

«Exsultate – Jubilate» senumna il concert festiv per la fin digl onn cul dirigent Simon Camartin dumengia, ils 28 da december 2025 ella Sala Peter Kaiser a Mustér e gliendisdis, ils 29 da december 2025 en La Fermata a Falera. Il tetel dil concert «Exsultate – Jubilate» ei in’ovra da Wolfgang Amadeus Mozart. L’ovra ei stada ina dallas preferidas da Mozart che ha cumponiu ella ella vegliadetgna da 17 onns sin in viadi ell’Italia. «L’ovra ei in juvel dalla musica sacrala», di Simon Camartin da Mustér che smeina era uonn la bitgetta dils dus concerts festivs per la fin digl onn en Surselva.

Anna Shumarina sco solista

D’udir ein las duas seras era ovras d’Antonin Dvořák, Frederick Delius e Carl Maria von Weber sco era da Jacques Offenbach e Bedřich Smetana. E denteren dat ei in schatg tut special, numnadamein il toc «Sil trutg enviers igl infinit» da Maka Virsaladze. Uonn ha il cumponist dalla Georgia scret quell’elegia en regurdienscha dad Ursicin Gion Gieli Derungs ch’ei morts igl onn 2024.

«Virsaladze e Derungs ein mai s’entupai, mo els savevan in da l’auter ed admiravan las ovras expressivas da l’auter», scriva Simon Camartin el program da concert. D’udir als concerts sco solista ei la sopranista Anna Shumarina. Ella ha studegiau cant d’opera e concert all’Academia naziunala da musica «Mykola Lysenko» a L’Viv ell’Ucraina. Ils davos onns eis ella stada d’udir a concerts ell’entira Europa. Denter auter era el KKL a Lucerna. Ella ei docenta per cant e ha gudignau plirs premis da musica internaziunals.

Dumengia, ils 28 da december 2025 allas 20.00 ella Sala Peter Kaiser dalla claustra a Mustér e gliendisdis, ils 29 da december 2025 allas 20.00 en La Fermata a Falera. Il concert ha liug medemamein mardis, ils 30 da december 2025 allas 17.00 ella halla plurivalenta a Vaz-sut.