L’original Häberli

Ina damaun da november 2025 ha noss collega da redacziun Martin Camichel menziunà en ina sesida redacziunala che Adolf Häberli (1934-2025) da San Murezzan saja mort. Adolf Häberli? – Lura ha noss collega raquintà dad intginas staziuns da vita da questa persuna, ed el l’ha descrit sco «original» da San Murezzan e sco «tip plitost querulant». Il medem di ha Martin Camichel lura scrit in artitgel en memoria dad Adolf Häberli (1934-2025) che la FMR ha publitgà en La Quotidiana dals 18 da november 2025.

En ses necrolog ha el menziunà tranter auter er il film documentar «Häberli» da l’onn 2020. Quel film dal cineast tudestg Moritz Müller-Preisser dettia in’invista en vita e chasa da l’original da San Murezzan. Ins sto savair che Adolf Häberli era ina persuna che viveva sco in messi en sia chasa amez San Murezzan (en in lieu enorm exclusiv). Dapertut en chasa eran sternidas gasettas e plazzadas plantinas, dischurden e caos dapertut. La chasa era perfin en privel da sballunar. Admoniziuns da las autoritads respundeva Adolf Häberli cun brevs diffamantas e selvadias – era en gasetta.

Per casualitad hai jau chattà il film «Häberli» quests dis sin la plattafurma Play SRF, in film ch’i vala la paina da guardar. El è in’avischinaziun fina ad ina persunalitad schrega e dispitaivla. Ma igl è era in purtret dad ina vita cuntradictorica: Adolf Häberli ha dad ina vart cumbattì per si’atgna chasa e l’agen dretg – ma el ha da l’autra vart laschà ir en malura exact quella chasa. Il film da radund 30 minutas na mussa pia betg mo la vista dad Adolf Häberli sez. A pled vegnan era parents, vischins ed enconuschents che mettan en dumonda ses cumbat e ses agir. Il film «Häberli» è accessibel fin als 16 da schaner 2026 sin Play SRF, en memoria da quest original da San Murezzan.