Limitar la fiera da cumprar hotels

Hotels grischuns – cunzunt da la pli auta categoria –  tutgan savens ad esters. Avant dus onns han per exempel investurs da la Rumenia e Lituania cumprà il hotel da tschintg stailas Waldhaus. Dapi lura è capità pauc a Flem, l’avertura è pir planisada en circa in onn.
Sper il lai da Thun è capità insatge sumegliant. Il Hotel Bellevue au Lac è vegnì acquistà per 10 milliuns francs dad gruppa da Abu Dhabi. Dapi lura na vegn betg pli servì alcohol e charnpiertg, il hotel è halal (prescripziuns islamicas da mangiar). La populaziun sa disturba, sco quai che SRF ha rapportà l’atun.
L’anteriur moderatur da «Kassensturz» e cussegl naziunal da Berna Ueli Schmezer (PS) vul impedir venditas en l’exteriur. En ina video-columna sin la plattafurma nau.ch di el: «Jau hai pli gugent, sche hotels vegnan cumprads da persunas ch’èn pli u main ragischadas en la regiun.» Perquai dovri dentant ina midada da la uschenumnada Lex Koller.

L’excepziun da la Lex Koller

La «culpa» che hotels sa tschentan en mauns esters è in’excepziun en questa Lex Koller. La lescha limitescha atgnamain la cumpra dad immobiglias en Svizra per persunas che n’han qua nagin domicil. Quai per impedir che memia bler terren svizzer tutgia a persunas da l’exteriur.
Enfin l’onn 1997 pertutgava la lescha betg mo terren privat, mabain er immobiglias da fatschenta. Il parlament ha dentant lura – pervia da problems da conjunctura sin squitsch da partidas burgaisas – puspè lubì a persunas da l’exteriur da cumprar immobiglias da fatschenta. Ed er avant intgins onns è in’emprova da midar la Lex Koller betg gartegiada.
Ina nov’emprova vuless il parlamentari da la vart sanestra Ueli Schmezer ussa ristgar, sco ch’el ha tradì il mardi passà a la FMR a l’ur da la sessiun d’enviern a Berna. Pertge che «cun questa excepziun èsi dapi onns pussaivel, che investurs da l’exteriur cumpran hotels svizzers en ils pli bels lieus. Investurs svizzers n’han simplamain nagina schanza cunter il chapital ester.» Ed il segund problem è tenor el: Blers «parcheschan» ils daners uschia en Svizra, ils pretschs d’immobiglias vegnan suflads si.

Ernst Wyrsch è sceptic

Senza dubi avess questa midada era consequenzas per l’hotellaria grischuna. Il president da l’associaziun Ernst Wyrsch tegna pauc da quest’idea, perquai ch’il chapital da l’ester saja impurtant: «Jau na chat quai in problem, perquai ch’i dat avunda reglaments che din ch’in hotel haja da restar in hotel. Nus stuain esser engraziaivels, sche nus pudain insumma mantegnair l’infrastructura dad hotels e ch’i vegnia er investì.»
E pertutgant il cas Waldhaus Flem agiunta Ernst Wyrsch: «Svizzers avunda avessan gì la schanza da cumprar questa perla da la hotellaria grischuna. Nagin n’ha vulì e perquai è l’hotel sa tschentà en mauns esters. Sche quai na fiss betg capità, fiss l’hotel ì en decadenza. E gliez na sa era betg esser l’alternativa.» Investurs svizzers calculeschian pli fraid e sajan era pli defensivs. Pertge tenor el è «il model da turissem fitg volatil, ins ristga bler, e dovra bler chapital per surmuntar crisas».

Varga ina milliarda francs investiziuns en l’Engiadin’Ota

La fiera d’hotels è ina fiera da milliardas, sco che las cifras mussan: En Svizra han investurs tenor ina stimaziun dal biro dad immobiglias CBRE investì ils ultims onns circa 3,4 milliardas francs en hotels. Ed era per il Grischun specific po il president da hotellaria grischuna numnar cifras: «En l’Engiadin’Ota vegn investì ils proxims tschintg onns varga ina milliarda francs en hotels, da quai era fitg bler da l’exteriur. Nus sco associaziun ans legrain, sch’ins ha tanta cretta en il futur dal turissem e da la hotellaria.»
Sch’el haja lura pli gugent ch’ils hotels sa tschentian en mauns esters? «Na, natiralmain preferissan nus ina soluziun svizra, ma nus n’avain simplamain betg la fiera.» Ernst Wyrsch raquinta cun plaschair che gist ultimamain haja l’Arosa Kulm, in hotel da luxus, pudì vegnir vendì ad Urs Nietlisbach, in Svizzer.
Questa «fiera» duai tenor il parlamentari Ueli Schmezer gist vegnir regulada cun la Lex Koller. Schebain quai chatta maioritads en il parlament a Berna, stat anc en las stailas e cuzza pli probabel anc in mument. El saja pir vi dad examinar e rimnar datas per lantschar ina moziun. Da vart burgaisa èsi da spetgar resistenza.