Anc mantga en president u ena presidenta

Igl interess per la vernissascha da sonda passada è sto fitg grond e dalla parteida èn stadas bleras persungas da Surses e dalla Val Alvra. Per la realisaziun dall’exposiziun «Pro Segantini en splendur» è stada responsabla l’istoricra d’art e d’architectura Juliane Sauer. Sustigneida è ella neida cunzont da Mark Batliner, igl anteriour president dall’associaziun, dantant er da varsaquantas persungas tg’èn igls davos tschintg decennis s’angaschedas ferm per la Pro Segantini. L’exposiziun actuala è en’exposiziun transitabla. Alla gleisch vign an pled e maletg igl angaschamaint cultural dall’associaziun giubilara, ma tematiso vign er igl avigneir dalla Pro Segantini, tg’è da preschaint sainza president e cun excepziun er sainza suprastanza.

La fundaziun è stada igl 20 da november 1975

Igl iniziant principal dall’Associaziun Pro Segantini è sto Max Wullimann, barmeir, en om interesso alla cultura e grond amatour da Giovanni Segantini. Igl Tessines è da lez taimp cunzont er nia sustignia da Renata ed Rinaldo Uffer. Sot tetg è la Sala Segantini stada digl 1975 anfignen igl 1999 ainten en clavo agl Stradung a Savognin, gist dasper l’Apoteca Son Mitgel. Cun Peder Spinatsch barmeir ò Max Wullimann igl onn dalla fundaziun dall’associaziun catto ena persunga indigena cun en immens interess per la cultura. Peder Spinatsch è sto president dalla Pro Segantini anfignen igl 1988, cura tgi Max Wullimann è mort. Successour da Peder Spinatsch scu parsoura dall’associaziun è davanto Mario Jegher da Tinizong. El è sto en president cun grond angaschamaint ed en parsoura tg’ò er vurdo bagn dalla finanzas dalla Pro Segantini. Igl 1999 ò Mario Jegher surdo igl presidi dalla Pro Segantini a Ruedi Brülisauer, barmeir, en giast da Savognin ed ena persunga cun bungas relaziuns tigl art ed er cun artists ed artistas. Igl 2004 è Ruedi Brülisauer sa retratg da sies uffezi presidial e surpiglia chel ò Ingrid Buol-Fontana da Salouf. En taimp è la Pro Segantini stada sainza president anfignen igl 2015 cura tgi Mark Batliner da Tinizong è sto agl timung dall’associaziun. Igl 2024 ò el termino la lavour da president cun l’exposiziun da Chen-Yi Fasciati-Ma da Beiva, en’exposiziun cun en grond success.

Treis maletgs originals da Giovanni Segantini

Siva da 25 onns sa catta la Sala Segantini aint igl «Pavillon da Scuder»  aint igl quartier Grava a Savognin. Igls davos 50 onns on blers artists ed artistas dalla regiun ed er digl Grischun survagnia sottetg ainten la Sala Segantini cun pudeir exponer lour ovras. Sa tgapescha tgi er artists ed artistas da renom internaziunal e naziunal on gia mess or lour ovras ainten la Sala Segantini. Tranter oter en chegl Varlin, Alberto Giacometti ed er Alois Carigiet. Digls 26 da zarcladour anfignen igls 8 d’avost èn schizont stos d’admirar ainten la Sala Segantini, treis maletgs originals da Giovanni Segantini. Scu ancunaschaint ò igl artist da renom internaziunal malagea ena gronda part dallas sias pi ancunaschaintas ovras an chels otg onns tg’el ò gia dimora a Savognin (1886 – 1894).

An chels tschintg decennis tgi dat l’Associaziun Pro Segantini ò chella gia fitg bungs onns ed er manc bungs onns. Gist igls davos 25 onns è igl domber da commembers e commembras permanentamaintg sa redutgia, chegl cunzont tgi blers e bleras èn morts. Da preschaint ò la Pro Segantini en problem tgi mantgan simplamaintg persungas tgi s’anagschan per l’associaziun ed er per la suprastanza. Er an chella tgossa duess l’exposiziun actuala purtar fretgs.