Mai per veia sainza igl apparat da fotografar

Siva dad 11 onns è Nicole Trucksess redactoura dalla gasetta regiunala «Novitats». Remarcabel è tgi la donna da 56 onns ò scumanzo an Germania per ena gasetta scu fotografa da sport – e pir pi tard è igl schurnalissem davanto la sia professiun. An chels onn tg’ella segna per la redacziun dalla gasetta regiunala ò la redactoura er fatg nundumbrevlas fotografias. Anvers la FMR ò ella detg: «Da passa 1000 fotografias vaia fatg ena schelta da 130 fotografias tgi savessan eventualmaintg esser adattadas per l’exposiziun aint igl museum regiunal da Vaz.»

Cugl president digl Museum local da Vaz, Urs Feubli ed er anc cun otras persungas è alloura neida fatga la schelta dallas 38 fotografias tg’èn da vaseir actualmaintg aint igl Museum da Vaz. Las fotografias èn da differenta grondezza, anramadas davos vèder u tratgas se sen acril u «alu dibond».

Fascinada dalla nateira

Schi Nicole Trucksess vo ord tgesa, mantga fitg darar igl apparat da fotografar. Chel seia en accumpagneder fitg fidevel, ò ella managea. Tg’ella è savens stada igl dretg mument aint igl dretg li, vign fitg bagn alla gleisch cun admirar las 38 fotografias exponeidas aint igl Museum da Vaz. Per far da chellas fotografias dovrigl er en bung îgl, pazienztga, taimp e perseveranza. Ella seia magari turnada en oter de agl madem li cun la speranza da veir anc miglra gleisch, miglra vista, l’atmosfera gista e l’adattada cleritad u er la stgiraglia perfetga.

Nicole Trucksess è siva da mattatscha adegna stada fascinada dalla nateira e chegl an tottas variaziuns, da mintg’ora, durant de e notg e da mintga staschung. Ella dei: «Schi ia sung ainten la nateira, ma catta fitg bagn e sung daveiras cuntainta.» Fascinada seia ella an spezial er dalla belezza, dalla varietad e dall’estetica dalla nateira. Chegl seia egna dallas raschungs tg’ella catta savens igls pi bels motivs cun eir or ainten la nateira. Er mintga staschung vegia la sia atgna singularitad, La redactoura e fotografa ò er a cor animals, cunzont tgangs, tgoras ed alloura nursas, cunzont nursas dalla razza «Walliser Schwarznasenschaf». Uscheia mantgan er betg tar l’exposiziun actuala aint igl Museum local da Vaz plessas fotografias fitg interessantas cun animals, els tg’èn propi motivs tgi caschungan bels muments.