Reservau 60 000 francs pil Pass Medelin

Ussa ha era la vischnaunca da Medel ina purschida attractiva per las indigenas ed ils indigens ch’ein activs enten viagiar, sport ni cultura. Cul Pass Medelin san ellas ed els retrer entochen maximalmein 500 francs per lur activitads. Persuenter ha la vischnaunca reservau 60 000 francs el preventiv digl onn 2026.

La primavera han las vischnauncas da Mustér, Tujetsch, Andermatt, Hospental e Realp lantschau la Golden Card. Quella cuosta 333 francs e per quella san tuttas habitontas e habitonts da quellas vischnauncas profitar d’in tschuppel favurs. Denter auter igl abonnament d’ir cun skis, la Viafier Matterhorn Gottard duront igl unviern da Mustér ad Andermatt ni il Center Fontauna ead il Bogn Sedrun.

Apparentamein ha quella purschida attratg igl interess da biaras e biars vischins dallas tschun vischnauncas. Mo buca mo da quellas e quels: Era a Medel e Sumvitg ei vegniu discutau davart la carta. A Sumvitg ei vegniu lantschau ina petiziun per separticipar alla Golden Card ed a Medel ha la giuventetgna iniziau ina discussiun en quei connex e quei cun success: Per las habitontas ed ils habitonts dalla vischnaunca da Medel ei vegniu scaffiu enteifer cuort temps in semegliont product sco la Golden Card. Il Pass Medelin ha vigur naven digl emprem da schaner 2026.

500 francs per habitont

Cun occasiun dalla davosa radunonza communala ei il model pil Pass Medelin vegnius presentaus. Ina gruppa da lavur installada dalla vischnaunca ha elavurau in model semeglionts alla Golden Card. Mintga habitonta e mintga habitont da Medel survegn entochen maximalmein 500 francs dalla vischnaunca per sias activitads. Da cuosts per abonnaments da sport, cultura ni commembradis ad uniuns da sport vegn restituiu mintgamai 70 %. Medemamein pigl abonnament da mesa taxa dils mieds dil traffic public. Cun excepziun digl abonnament da mesa taxa vala l’indemnisaziun dalla vischnaunca sulettamein per activitads che san vegnir exequidas en vischnaunca ni en ina vischnaunca vischinonta.

Ina purschida attractiva

«L’idea dil Pass Medelin ei da promover l’attractivitad dalla vischnaunca. El ei ina purschida per tuttas e tuts indigens», di Lara Bergamin ch’ei separticipada alla gruppa da lavur che ha presentau il model alla radunonza communala da miez december. Sco il president communal Claudio Simonet di, ha la purschida nova cattau in bien resun alla radunonza communala: «Cun rodund 30 participontas e participonts ei la radunonza danovamein stada frequentada fetg bein, surtut da giuventetgna. La proposta integrada cun 60 000 francs el preventiv ei vegnida sustenida cumpleinamein.»

«Ina fetg buna soluziun»

Ch’il Pass Medelin catta accoglientscha di era Lara Bergamin: «Nus havein giu biars buns resuns per quella purschida.» Contas persunas che vegnan la fin finala a nezegiar la purschida vegn pér aunc a semussar. «La summa da 60 000 francs vegn segiramein a tonscher persuenter ed ei era supportabla per la vischnaunca. Nus quintein buca ch’ella vegni duvrada cumpleinamein. Da principi sa gie mintga vischina e mintga vischin profitar dil pass», di Claudio Simonet.

Danilo Giger che ha presentau il model dil Pass Medelin en num dalla gruppa da lavur alla radunonza communala manegia: «Tenor miu manegiar ei quei ina fetg buna soluziun. Ella ei era pli favoreivla e pli sempla da realisar, che sche la vischnaunca havess stuiu secumprar en zanua sco per exempel ella Golden Card.» 

Daners duein star ella regiun

«Ina dallas finamiras dil Pass Medelin ei ch’ils daners che la vischnaunca paga persuenter restan ella regiun. Per quei motiv duei la contribuziun d’entochen maximalmein 500 francs vegnir impundida per ina purschida en vischnaunca ni en ina vischnaunca vischinonta. La suletta excepziun ei il sustegn finanzial pils mieds dil traffic public», di Lara Bergamin.

Avon che lantschar il Pass Medelin han la suprastonza communala e la gruppa da lavur sclariu las pusseivladads da saver separticipar alla Golden Card. Sin fundament da cunvegnientschas existentas dallas tschun vischnauncas participadas vid quella ei in’integraziun dalla vischnaunca da Medel ella Golden Card buca stada pusseivla.