Mias davosas lingias egl onn veder

Igl onn ei ius sperasvi ch’jeu sai nuota co. Ei para a mi ch’jeu hagi pér gest fatg propiests pigl onn 2025. Ed ussa va quel gia a fin. Nuota da far curvien ch’jeu hai buca giu peda da metter en vigur mes grondius propiests, cu gis e meins vegnan e vargan cun ina tala spertadad. Ils gis mo schulan speraso, ed jeu piardel beinduras la survesta. Ah … ils cons vein nus oz? Ei quei l’empudientscha dalla hurscha quotidiana, ni eis ei semplamein in’enzenna ch’jeu vegn pli e pli plauna e selasch entardar cun da tut il gianter?

Ussa, avon che far novs propiests e s’empitschar digl onn niev ch’ei sin sava, eis ei franc in bien mument da dar in sguard anavos sils meins vargai. Mirar tgei ch’ei capitau entuorn mei ed ora el mund e schar reviver enqual caussa. Silmeins ils eveniments plascheivels ch’ein vargai memia spert e ch’ein, sco jeu quetel, stai uonn onz scars. Mo guess ha ei era dau uonn «empau bien ed empau schliet», sco mia mumma veva per moda da gir. Tonaton, e malgrad che mes egliers ein ton sco novs, basegnel jeu bunamein ina lupa per anflar il positiv e legreivel.

Dess jeu pia sefatschentar cul schliet, cun da quei mender? Lein gir cun regents che han fatg e fan da stuorn. Che prendan decisiuns fasierlias e talas che laian schizun temer il mender. Ni plitost s’occupar cul respect in per l’auter, che va pli e pli a piarder. Cugl individualissem ch’ei omnipresents. Ni cul clima, cun armas d’uiara, cun fugitivs …

Na ed aunc inaga na! Pil gi da sogn Silvester selubeschel jeu da metter dalla vart ils quitaus. Da nuota schar vargar en il cumbel. Dad ir davos aura, enstagl da prender il mund si dies.

Buca ch’jeu fagess fiastuna da sogn Silvester, ina sco dil temps da mia giuventetgna. Lu, cu nus giuvenils savevan gitg ordavon, tgei ustrias che hagien notg libra ella regiun. Cu nus giuvnas e giuvens svanevan la sera dad esch ora culla cunzina da nos geniturs, da lu era turnar a casa zacu. E turnar turnavan nus. Zacu. Cu ei tuccava da gis l’autra damaun, ni magari pér cu nos babs turnavan dil perver. Suenter che las ustrias serravan lur portas, anflavan nus utschals dalla bialaura numnadamein maneivel suttetg tier enzatgi dalla truppa. Baul tscheu, baul leu. Nua ch’ei deva caffè ed ina dètga cazzetta spaghettis cun sosa da tomata, nies past obligatori suenter esser stai per las taviarnas l’entira notg.

Gia da quels onns fineva il gi da sogn Silvester cun dabia rueida e cun termentas vergnas. Da quellas che mavan malamein aprau cun quei bien Silvester che nus vessen giu da commemorar quei davos gi digl onn. Il pauper schani vegneva alla cuorta. Mo dalurenneu eis el matei s’endisaus lundervi.  

Festivei pia e gudi il gi e la sera tenor gust e plascher e nua che vus vuleis. Mo eba – turnei lu era a casa zacu!

Leontina Lergier-Caviezel è autura e viva en la vischinanza da Berna. Durant blers onns è ella stada ina columnista regulara. Ma ella ha ussa communitgà a la FMR da vulair chalar cun sias columnas. – Pia da cor, preziada Leontina, grazia fitg per ses texts prezius.