Lectura Rumantscha

Bun di, bun onn a l’emprima ediziun da la Lectura Rumantscha en il 2026. Suenter las festas datti a l’entschatta gist ina tematica betg main greva che las tschaveras da Nadal.

Il zain grond ha taschì da Nadal

Da Nadal tutgan las baselgias ferventamain per annunziar la naschientscha da Jesus Cristus. A Mustér èsi dentant restà in pau pli quiet. La raschun: Il battagl dal zain grond è rut durant clamar ils parochians e las parochianas a la messa da la vigilgia da Nadal. Il toc metal ha perfurà cun ses pais dad 80 fin 100 kilograms dus palantschieus d’aissas. Ils proxims dis vegn in’interpresa a prender mesira per in nov battagl, uschia che il zain grond vegn forsa ad esser pront per il proxim Nadal.

Nova gestiun, vegl concept

I para dad esser vegnì pli quiet enturn l’Hotel Scuol Palace. Ils novs gestiunaris contestan dentant quella impressiun. Els na tschertgian betg las lingias grassas, ma i giria tuttina bler en l’hotel. La fin 2023 è l’hotel istoric vegnì sveglià or da ses siemi da Rosaspina cun in concept da cura e cultura. Tino Andri, Julia Brändle e Cinzia Regensburger avevan da lezzas uras surpiglià la gestiun. In onn pli tard ha il possessur american remplazzà ils gestiunaris. La nova squadra cuntinuescha cun il concept da cultura e sanadad e vul engrondir la sparta medicinala, sco ch’ella tradescha en in’intervista.

Il pitg da crusch en nova furma

Il pitg da crusch era en scola da lavur per bleras ina sgarschur. Silvia Tschuor da Sagogn ha applitgà dacurt quella tecnica per dus da ses maletgs senza stentas. «Jau lavur cun mia egliada e darar cun fotografias», ha declerà la pictura artista en ses atelier en il Casti Löwensberg a Schluein. Il pli savens malegia Silvia Tschuor che admira Ferdinand Hodler cuntradas.

Bun divertiment cun la Lectura Rumantscha!