Lai e Son Murezza on interess

An en meis ò li aint igl stadion San Siro a Milang l’avertura dalla 25avla ediziun digls gis olimpics d’anviern «Milano Cortina 2026». Tgunsch pussebel tgi 12 onns pi tard on igls gis olimpics d’anviern 2038 li an Svizra. Davainta chegl realitad on schi tot vo tenor plan er li a Lai ed a Son Murezza disciplinas. Per l’amprema geda organisess igl 2038 betg en li u ena regiun igls gis olimpics d’anviern, mabagn gist en paeis.

Candidatura exclusiva

Igl november 2023 on Swiss Olympic, Swissparalympic e las associaziuns naziunalas digl sport d’anviern fundo l’uniun gis olimpics e paralimpics d’anviern «Switzerland 2038». Chella uniun è incumbensada cugl preparamaint digl dossier da candidatura ed igl dialog priviligia per mang digl Comite olimpic internaziunal. Chel ò siero alla Svizra anfignen alla fegn digl 2027 l’exclusivadad d’ena elaboraziun d’en dossier da candidatura pigls gis olimpics d’anviern 2038 eventuals an Svizra. Igl Comite olimpic internaziunal renunztga anfignen alla fegn digl onn proxim da contactar otras candidaturas potenzialas. Detg concret monta chegl tgi igl Comite olimpic internaziunal reserva anfignen alla fegn digl onn proxim exclusiv per la Svizra l’organisaziun digls gis olimpics d’anviern 2038.

Las suprastanzas communalas èn infurmadas

Exclusivamaintg on igls cumegns da Vaz, da Curvalda, da Lantsch ed igl cumegn da Son Murezza e la Son Murezza Turissem SA infurmo las gasettas regiunalas chegl tgi pertotga igls dus lis e la collaboraziun e participaziun cun l’uniun «Switzerland 2038». Via ena conferenza da video on infurmo e do pled e fatg Maurin Malär, igl mastral digl cumegn da Vaz, Reto Matossi, igl vicemastral digl cumegn da Son Murezza, e Marijana Jakic, directoura dalla Son Murezza Turissem SA: Igls gremis politics, vot deir las suprastanzas, seian infurmads tgi Lai e Son Murezza totgan aint igl Grischun tigls dus lis noua tgi disciplinas digls gis olimpics d’anviern 2038 vessan er li, schi igl comite olimpic internaziunal vign a risguardar la Svizra scu organisatoura da chel event internaziunal.

Maurin Malär, igl president communal da Vaz, ò menziuno tg’el vegia infurmo Simon Willi, igl mastral da Lantsch, ed er Rolf Schumacher, commember dalla suprastanza digl cumegn da Curvalda. Scu tgi Reto Matossi, igl vicepresident communal da Son Murezza, ò menziuno, seian er igls cumegns da Silvaplana e da Schlarigna nias infurmos tgi l’uniun tetgala «Switzerland 2038» seia an contact cun Son Murezza pertutgont lis per cursas da plessas disciplinas da sport.

A Lai e Lantsch biatlon

Maurin Malär ò detg tgi igls dus cumegns vaschigns, igl cumegn da Lantsch ed igl cumegn da Curvalda, vegian reagea positivamaintg sen la dumonda, schi igl interess d’ena collaboraziun seia avant mang. All’Arena da biatlon Roland a Lantsch vessan lia las cursas da biatlon. An tge furma finanziala tgi igls treis cumegns da Vaz, Lantsch e Curvalda vessan da sa participar è igl mument anc betg ancunaschaint. Maurin Malär ò menziuno tgi pi prubabel vessan igls cumegns da decider pertutgont en credit d’impegn tgi niss fixo, schizont cun ena votaziun all’urna, tot tenor la cumpetenza finanziala digls cumegns. Da preschaint seian bagn anc bleras dumondas avertas, dei igl mastral digl cumegn da Vaz. Per el seia da gronda impurtanza tgi la populaziun saptga tgi la regiun da vacanzas da Lai totga tar egna da chellas tgi igls gis olimpics d’anviern 2038 savessan er aveir li.

Quatter disciplinas a Son Murezza e conturn

A Son Murezza on gia li igl 1928 ed igl 1948 igls gis olimpics d’anviern. Chegl èn er las unicas gedas tgi igls gis olimpics on gia li an Svizra. Segna la Svizra igl 2038 per l’organisaziun digls gis olimpics d’anviern vessan tgunsch pussebel 90 onns pi tard li a Son Murezza puspe gis olimpics. Li vessan a Son Murezza las cursas da bob. Lò on gio gia li plessas gedas campiunadis mundials da bob, uscheia igl 2023 e proximamaintg igl 2028. Li vessan a Son Murezza er las cursas da skeleton e scusalar. Alla Corviglia ed agl Corvatsch duessan aveir li tot las disciplinas da freestyle. Igls gis olimpics d’anviern 2038 an Svizra fissan damai previas d’organisar decentral.

Tgombras per atlets ed atletas

Sa tgapescha tgi igl favrer è a Lai ed a Son Murezza staschung ota e chegl er igl 2038. Reto Matossi ò detg tgi impurtant seia da cattar tgombras per atlets ed atletas ainten la regiun da Son Murezza ed igl madem vala er per la regiun da vacanzas da Lai. Igls fans tschertgan sez cutier e seian er pronts da pernottar ainten lis pi lontans digls dus centers Lai e Son Murezza. Dastga la Svizra organisar igls gis olimpics 2038 ò l’avertura li a Berna e la festa da finiziun a Losanna. Tant a Lai scu er a Son Murezza duessan las cursas aveir li cun l’infrastructura existenta, chegl on detg Maurin Malär ed er Reto Matossi.