Curaulta, la pintga ed efficienta
Dapi l’entschatta digl onn 2026 dat ei ella branscha da sanadad ina cassa nova. Sco quei che la presidenta dil cussegl da fundaziun dalla Curaulta, Paula Berni-Derungs, ha declarau gievgia a caschun d’ina sentupada cullas medias, ei la fusiun dalla SanaVals e dalla Lumneziana gartegiada. Cul num «Curaulta» porscha la cassa nova tuttas prestaziuns e survetschs per actualmein 5425 assicurai.
Ella ei ina dallas pintgas cassas da sanadad ch’ei dat en Svizra. Ella porscha las segiradas da sanadad obligatoricas, purschidas supplementaras cumpletteschan las prestaziuns en cass da malsogna, accident ni maternitad. Ed ella recepescha unicamein persunas che vivan el Grischun. Quei ei la DNA dalla Curaulta, la «nova» cassa da sanadad en Lumnezia che ha entschiet igl 1 da schaner 2026 sia gestiun. Igl ei ina nova entschatta per duas cassas da malsauns, respectiv da sanadad, ch’ei dat dapi varga 100 onns el cumin dalla Lumnezia. La Curaulta ei seformada ord la fusiun dallas duas cassas independentas, la SanaVals e la Lumneziana. SanaVals cumpigliava ils assicurai dalla Val S. Pieder e dalla Lumnezia sut e la Lumneziana quels dalla Lumnezia sura.
Situaziun stabila
Gievgia ha il cussegl da fundaziun curaulta envidau las medias el post da gestiun a Vella. Sco quei che Paula Berni-Derungs, la presidenta dil cussegl, ha confirmau, ha gl’Uffeci federal da sanadad renconuschiu la nova cassa sco menaschi solid e finanzas saunas. La presidenta ha confirmau plinavon ch’ins vegni a tener omisdus biros. Il spurtegl resta aschia datier alla clientella, ton a Vella sco a Val S. Pieder. Siu emprem onn da gestiun 2026 ha la Curaulta entschiet cun 5425 commembras e commembers. La Lumneziana ha valiu ils davos onns ufficialmein sco pli pintga cassa da malsauns independenta dalla Svizra.
Vinavon en dus loghens
Buca lunsch naven da quei record era la SanaVals cun ses 3579 assicurai. Igl uost 2024 han ils dus cussegls da fundaziun instradau in process da fusiun e Paula Berni-Derungs ha surpriu il tgamun dalla cumissiun. «Omisduas cassas eran en ina situaziun stabila, ton ord vesta dil persunal sco era dallas finanzas», ha ella getg alla conferenza da medias.
Tonaton seigi ei stau uras da semetter ensemen, aschia Paula Berni-Derungs. «Nossa finamira ei stada da scaffir ina ferma cassa regiunala», ha ella declarau alla FMR.«La gronda part da nos assicurai s’auda tier in tschep da clients fideivels», ha Matilda Arpagaus confirmau. Igl 1 da schaner 2026 ha ella surpriu il tgamun operativ dalla Curaulta. Ella e treis specialistas d’assicuranzas da sanadad lavuran a Vella en plazzas parzialas, a Val S. Pieder ein medemamein treis collavuraturas ella sedia d’entochen ussa dalla SanaVals.
Eliminar lavur dubla
Adina per la medema caussa, denton a moda engaschada, solida ed independenta, ein omisduas cassas sesviluppadas. Cugl 1 da schaner 2026 han ellas fusiunau. La fusiun seigi stada madira, ha Paula Berni-Derungs puntuau. «Il motiv ei stau che nus fagevan bia lavur dubla. Cun fusiunar rinforzein nus la gestiun», ha la presidenta dil cussegl da fundaziun curaulta declarau. Matilda Arpagaus, la meinagestiun, cumplettescha: «Ed optimar ils process, instruments e sistems da lavur, adina a favur dalla qualitad e per da nossa clientella».
Differentas historias
La SanaVals e la Lumneziana han historias parallelas. Marcus Cavegn, commember dil cussegl da fundaziun curaulta, ha descret ellas a caschun dalla presentaziun. Duront decennis han las duas cassas gestiunau culs nums «Lumnezia I» e «Lumnezia II». Oriundamein fuss ei stau previu da fundar avon varga 100 onns pigl entir cumin Lumnezia ina suletta cassa da malsauns. En ina votaziun corrispundenta han 15 vuschs muncau da realisar quella finamira. Aschia han ins fundau 1918 ella Lumnezia sura la cassa publica Lumnezia I e 1919 la cassa publica Lumnezia II per Val S. Pieder ed ils vitgs dalla Lumnezia sut.
La Confederaziun haveva mess en vigur 1918 la lescha federala davart la tgira da malsauns e numerusas cassas publicas obligatoricas ein naschidas ina suenter l’autra ell’entira tiara. La Lumnezia sura cun sia cassa Lumnezia I ha organisau autruisa sia prevenziun en caussas da sanadad che Val S. Pieder e Suraua. Val S. Pieder ha giu duront decennis ina tgirunza communala, igl era ina muniessa che la claustra dallas soras dominicanas da Glion metteva a disposiziun. Tras la via da Val S. Pieder era la populaziun era pli datier a Glion e siu provediment sanitar.
A moda differenziada ei il sanitaresser sesvilupaus ella Lumnezia sura. Leu han persunalitads gidau da fundar ina pratica da miedi da casa. Cun docter De Righetti dalla Val Blegn ei quei gartegiau. Quel ha praticau 36 onns en ina casa privata a Vella cun stanza da pratica e stanza da spetga. Siu successur ei docter De Giorgi, medemamein in Tessines daventaus. Cuort avon ils onns 60 ha la cassa da malsauns Lumnezia 1 baghegiau casa cun habitaziun e pratica da miedi. En quella ha il tierz miedi da casa en Lumnezia, Gian Bundi, praticau.
Gust da leger dapli?