Per trais uras a Pandora

Propi in grond fan dals films da fantasy dad Avatar na sun jau betg. Ils emprims dus films – dals onns 2009 e 2022 – èn ids tras ils kinos senza mia visita. Quels films han gì in successun tar il public sco mo paucs auters films. Ussa, curt avant Nadal, è vegnida en ils kinos la terza part: «Avatar: Fire and Ash». Questa giada hai jau prendì la chaschun per ir a guardar il blockbuster da passa trais uras, sa chapescha cun egliers da 3D per propi avair il program cumplet!

Per quellas e quels che n’enconuschan betg Avatar: I sa tracta da films che vegnan giugads dad acturas ed acturs reals, ma che vegnan lura animads ferm al computer. Il resultat è in’estetica per uschè dir surreala e psicadelica. L’istorgia da basa dad Avatar è simpla: Sin il planet Pandora vivan creatiras umanoidas (ils Na’vi) en pasch ed armonia cun la natira. Pandora è ritg da resursas ed energias natiralas. Quai sveglia natiralmain l’interess dals umans reals. Il conflict tranter ils nauschs (umans) ed ils buns (Na’vis) è pia programmà. Tensiuns, intrigas e battaglias epicas èn la consequenza.

A quell’istorgia da basa resta il reschissur James Cameron fidaivel en il terz film dad Avatar che vegn uss en ils kinos. Igl è puspè ina bumba da maletgs cun balenas giganticas, navs che sgolan tras l’aria e cumbats tranter bartgas da fier e draguns-utschels. Tut è spert, sgiaglià, dramatic e chargià. Suenter trais uras film, cun ina battaglia finala da passa in’ura (!), sun jau stà plat. Ma er impressiunà.

Cler, in bel di vegn Avatar er en la televisiun platta. Ma forsa vali la paina dad ir a guardar ussa la versiun tridimensiunala en il kino. Inclusiv popcorn real, tridimensiunal e da sal.