El final eis ei iu péz a cup

Gudignau il 19avel campiunadi grischun han Peter Montalta da Schluein e Norbert Carigiet da Glion, dus amaturs dil giug da troccas fetg engaschai che giogan regularmein duront igl entir onn. Il medem vala pils vicecampiuns Julian Cathomas da Breil e Lothar Cajacob da Sumvitg e per Marlis Caduff e Clau Maissen da Danis/Tavanasa che han aquistau la medaglia da bronz. Tenor il president cantunal Andreas Muoth seigien las partidas dil quartfinal e dil miezfinal stadas fetg diras e liungas. «Igl ei iu péz a cup ellas rundas finalas denter ils emprems ella rangaziun» ha el detg. «Quei ein tut trochistas e trochists cumprovai ch’ein gia stai en auters turniers denter ils victurs.» Mo malgrad la concurrenza seigien las participontas ed ils participonts dil campinadi grischun sc’ina famiglia che s’entaupi inagada ad onn ha Andreas Muoth detg.

Biaras e biars dalla Surselva

«Troccas ei naturalmein in giug che vegn daus surtut en Surselva», rispunda la menadra da giug e suprastonta dalla uniun cantunala Annalisa Cathomas alla damonda dalla FMR danunder che tut quellas e quels en sala a Schluein derivien. «Jeu manegel ch’ina gronda part dallas 76 persunas ha in ligiom culla Surselva.» En autras regiuns dil Grischun ni schizun ella Bassa vegni ei era dau troccas da singulas e singuls, declara ella. En scadin cass hagi ei – a basa d’iniziativas privatas – era gia dau cuors da dar troccas ordeifer la Surselva.

El text da medias che l’Uniun grischuna da troccas ha tarmess suenter il turnier scriva la suprastonza che cun il campiunadi grischun vegli ins tgirar e promover la tradiziun dil dar troccas, da quei giug fetg cumplex e spanegiont che seigi da gronda muntada per il lungatg e la cultura romontscha.

Giuvenils ein online

Annalisa Cathomas ha detg ch’ella seigi impressiunada dil grond diember da participontas e participonts al campiunadi grischun d’uonn: «Mia speronza ei ch’ei detti ils proxims onns era giugadurs giuvens che prendien part dil turnier. Oz hai jeu l’impressiun che biaras giuvnas e giuvens gioghien online per esser independents.» Ei seigi ina incumbensa indispensalba dall’uniun grischuna d’animar las giuvnas ed ils giuvens da separticipar dil campiunadi grischun.

Pil tschurvi e pil cor

Ella sala polivalenta da Schluein ei vegniu semiserau e giugau per puncts. Agl ur han ins era survegniu l’impressiun d’esser en in’occurrenza da sport. Alla damonda dil dar troccas sco exercezi da fitness ha Annalisa Cathomas rispundiu ch’ella seigi dalla ferma visa che dar troccas seigi bien pil tschurvi e pil cor. «Il giug pretenda concentraziun e memoria. Cun dar troccas gudogn’ins era novas enconuschentas ed enconuschents ed ei colligia generaziuns. Quei ei la part pil cor.» Annalisa Cathomas ha detg ch’il giugar troccas gidi era da metter d’ina vart la truscha quotidiana e d’entrar en in mund da wellness.

Ins emblidi tut quei che fatschenti ins e las uras varghien enorm spert cun dar troccas. «Quei hai jeu era resentiu cheu en sala oz», di la menadra dil turnier. «Nus essan ussa cheu dapi sis uras. Mo jeu hai il sentiment che nus seigien pér grad vegni avon cuort mument.»

2027 a Breil

Tut las 76 participontas e participonts dil 19avel Campiunadi grischun da troccas a Schluein han giugau en teams da dus. Il campiunadi grischun ei dapi 19 onns il punct culminont digl onn da troccas per giugaduras e giugadurs che vulan semiserar el giug da dar scart cun las 78 cartas. Igl onn proxim envida l’Uniun grischuna da troccas al 20avel campiunadi grischun che ha liug a Breil.