Il tscheiver sursilvan ha entschiet

Dapi il 2008 organiseschan Rosvita Alig e Rosina Derungs il tscheiver da Vrin. «Menar atras il tscheiver ei per nus da dar la caschun alla glieud da star si legher e da guder il barlot», han las duas organisaturas detg la sonda cuort avon la partenza dil til dils affons cun las duas guggas Grischalottas da Glion e Falera e cun Las lieurs da Trun. Cuort suenter ei il til semess en moviment naven dil plaz avon scola da Vrin. Alla testa las Grischalottas e lu ils affons costumai cun resti en tuttas colurs sco bulius, cowboys, costums d’animals e perfin in sco monster. Enamiez il til Las Lieurs da Trun e lu puspei affons e las duas organisaturas dil tscheiver che tenevan si da frestg il publicum e repartevan dultschems. Strusch in dils numerus aspectaturs sper via che ha buc era survegniu ina plievgia da confettis dils affons.

Dapli glieud d’ordeifer

Il tscheiver da Vrin ha paucas structuras e vegn buc exequius tenor in regulativ. Las duas dunnas fuorman il comite. Ellas miran d’haver a disposiziun la halla dalla casa da scola. Suenter ch’il til ei ius tras il vitg, tochen si Crusch ed anavos sin plaz-scola, dat ei in refrestg pils affons. Rosvita Alig di ch’il diember da participontas e participonts d’ordeifer seigi carschius en cumparegliaziun cun ils emprems onns. «Igl ei era pli paucs affons ch’ils emprems onns. Lu havevan nus aunc las scolas che separticipavan.»

Il tscheiver da Vrin hagi buc in grond til sco Trun, Mustér ni Glion, di Rosina Derungs. Mo ei seigi in til famigliar tenor il motto pign, mo prezius. «Nus havein plascher da tut quellas e quels che vegnan e prendein era part dils tscheivers da quellas guggas che vegnan tier nus.»

In regal pils affons

Las organisaturas dil tscheiver Rosvita Alig e Rosina Derungs dattan peisa alla pusseivladad da schar separticipar ils affons vid il tscheiver. «Gia dapi l’entschatta eis ei aschia che mintga affon che vegn a Vrin al til survegn in regal da nus. Quei animescha segiramein era da vegnir.» La sera allas 19.30 ei in’ulteriura musica da tscheiver s’associada ed ei ha dau in til dallas musicas da tscheiver tras il vitg. Immediat suenter quei til ha il bal entschiet ella halla dalla casa da scola.

Las occurrenzas da tscheiver en Surselva cuntinueschan. Ils 17 da schaner 2026 ei tscheiver a Danis, ed ils 24 da schaner ha liug il til da tscheiver a Sumvitg. Lu suondan ils 31 da schaner Glion, ils 7 da fevrer Trun, ils 12 da fevrer Sedrun ed ils 14 da fevrer Mustér