Caspar, Melcher e Baltasar han cantau a Laax

La davosa sonda ein ils treis sogns Retgs stai sin viadi ed han cantau en biars vitgs dalla Surselva. Ils treis sogns Retgs van ozilgi buca pli dapertut da casa tier casa. Igl usit ei denton semantenius e vegn a semantener era vinavon. Sco mintg’onn han ils treis sogns Retgs era cantau sin differents plazs a Laax. Els han fatg quei cun grond plascher e tschaffen sut l’egida dil scolast Serafin Sgier ed han aschia manteniu e tgirau il vegl usit. Ils treis sogns Retgs da Laax han cantau en biblioteca en Casa de Mont, silla plazza avon il center communal, alla Via Grava, a Cons ed alla Via Spendas. Cun questa caschun ha il chor dils treis sogns Retgs a Laax rimnau ina collecta en favur d’affons en pitgiras. La fotografia muossa ils treis sogns Retgs la sonda sera allas 18.00 avon il center communal da Laax.