La PLD va cun candidatura dubla en il cumbat electoral da quest onn
La Partida liberaldemocratica dal Grischun ha actualmain in sez en la Regenza. Tar las elecziuns dals 14 da zercladur 2026 va ella cun ina candidatura dubla en la cursa, sco che la PLD ha decis venderdi passà en sia radunanza da delegadas e delegads. Cun la candidatura dal Bregagliot Maurizio Michael vuless la partida puspè dar al Grischun talian ina vusch en la regenza grischuna.
A sia radunanza da delegads e delegadas da venderdi passà en il chastè da La Punt/Reichenau ha la Partida liberaldemocratica dal Grischun (PLD) nominà ses candidats per la Regenza. Gia pli ditg eri cler ch’il cusseglier guvernativ Martin Bühler – ch’è dapi il 2023 en l’executiva – vegnia a recandidar ils 14 da zercladur 2026. Ma la direcziun da la partida grischuna ha decidì dad ir en la cursa gist cun duas persunas, ed ella ha perquai proponì da nominar il politicher bregagliot Maurizio Michael. Unanimamain han ils delegads e las delegadas sustegnì venderdi saira quel ticket dubel «Bühler-Michael», dentant en absenza dal cusseglier guvernativ Martin Bühler. Quel era sco president da la Regenza da la partida en il Vallais al di naziunal da malencurada per las unfrendas da Crans-Montana.
Dapi 16 onns en il Cussegl grond
Maurizio Michael da Castasegna, il vitg giudim en la vischnanca da Bregaglia, è gia dapi l’onn 2010 deputà en il Cussegl grond. Dapi il 2024 è el era president da la PLD grischuna. El è da lingua taliana, discurra sper il dialect bregagliot dentant era currentamain sutsilvan, damai che ses geniturs derivan da la Val Schons.
Tranter auter è Maurizio Michael president dal Centro puntoBregaglia che s’engascha per promover interpresas ed innovaziun en la val. Ed el presidiescha era la cumissiun administrativa dal Centro Sanitario Bregaglia.
RTR: Pertge va la PLD insumma cun Vossa candidatura en il cumbat electoral per la regenza grischuna?
Maurizio Michael: La direcziun da la Partida liberaldemocratica ha dumandà mai da candidar, per che la Regenza possia propi represchentar la diversitad da noss chantun. Per mai è quai impurtant. Jau sun dapi blers onns en il Cussegl grond ed jau lavur bler era per sustegnair las linguas, las culturas e las regiuns perifericas dal Grischun. Jau pens ch’i saja il dretg mument per mia candidatura or dal Grischun talian.
La PLD va en la cursa electorala gist cun duas candidaturas – cun cusseglier guvernativ Martin Bühler e cun Vus. Na periclitais Vus uschia betg l’elecziun dad in u da l’auter?
Na. Nus avain discutà quella strategia d’elecziun en il ravugl da la direcziun da la partida – er ensemen cun cusseglier guvernativ Martin Bühler. Tenor nossa valitaziun ha Martin Bühler fatg ina fitg buna lavur sco regent – el è in bun cusseglier guvernativ. Perquai na sto el probabel betg temair per sia reelecziun. Las novas candidaturas – sco mia – han percunter adina in pau pli grev. I dat gea quest onn gist pliras novas candidatas per il post che vegn liber. E perquai vom jau ussa cun gust fin ils 14 da zercladur 2026 en il cumbat electoral, ensemen cun mia partida e mias collegas dal Cussegl grond.
Apunta, entant datti bleras candidaturas da dunnas. Èsi forsa perfin in avantatg per Vus dad esser per il mument il sulet um che sa metta da nov a disposiziun?
Nossa partida ha gia bleras dunnas en ses uffizis, saja en il Cussegl grond ubain cun Anna Giacometti sco cussegliera naziunala a Berna. Internamain ans avain nus dumandads: Tge dovra il Grischun? Tge manca al chantun? – E qua è la represchentanza da las valladas talianas e da la lingua taliana stada per nus da grond’impurtanza. Perquai essan nus vegnids a la conclusiun da preschentar mia candidatura.
Vus essas gia ditg activ en la politica grischuna, tranter auter dapi 16 onns en il Cussegl grond. Tge fiss l’emprima tematica che Vus vulessas prender enta maun?
Quai è grev da dir. Las tematicas vegnan per gronda part gea dictadas da svilups e schabetgs generals en il chantun Grischun. Ma a cor stat a mai propi da pudair represchentar ils interess ed ils basegns da las regiuns en il sid da noss chantun e dad era tgirar l’impurtant barat cun noss vischins da l’Italia. E lura hai jau era acquistà durant ils davos onns bleras experientschas en il sectur da sanadad, per exempel tar il Centro Sanitario Bregaglia. En quel champ hai jau pia emprais fitg bler – in savair che jau pudess trair a niz en la Regenza.
Pliras candidaturas per ils tschintg sezs
Las elecziuns da la Regenza èn ils 14 da zercladur 2026. D’occupar da nov è in sez, numnadamain quel dal cusseglier guvernativ Jon Domenic Parolini (Center) che na candidescha betg pli pervi da limitaziun dal temp d’uffizi. D’eleger u reeleger èn cusseglieras u cussegliers guvernativs per tut ils tschintg posts en la regenza grischuna. Sper la PLD sa mettan anc autras candidaturas en ils stadals.
ll Center ha actualmain trais sezs en l’executiva e vul defender quels. Sper ils cussegliers en uffizi Marcus Caduff e Carmelia Maissen porta la partida Aita Zanetti, capo da Scuol, sco terza candidata che duai defender il sez da Jon Domenic Parolini.
La PPS va cun Valérie Favre Accola en la cursa. La deputada da Tavau è actualmain presidenta dal Cussegl grond e vuless reconquistar in sez per sia partida che n’è dapi 17 onns betg pli en l’executiva.
La PS ha annunzià che ses cusseglier guvernativ en uffizi Peter Peyer candidescha per in’ulteriura perioda d’uffizi, senza dentant proponer ina segunda candidatura da la PS.
Per la PLD dal Grischun sa metta a disposiziun per in’ulteriura perioda d’uffizi il cusseglier guvernativ Martin Bühler. Cun Maurizio Michael emprova la partida da recaltgar in segund sez.
Plinavant ha la Partida verd-liberala (PVL) grischuna nominà Nora Saratz Cazin uffizialmain sco candidata per la regenza grischuna. La presidenta communala da Puntraschigna candidescha per recaltgar l’emprim sez insumma per la PVL en la regenza grischuna. (rtr/fmr)
Gust da leger dapli?