Lectura Rumantscha

Bun per il tscharvè ed il cor

Sas ti dar troccas? Na? – Alura manchentas ti ina buna chaschun da promover tia sanadad. Tenor Annalisa Cathomas da l’Uniun grischuna da troccas è quest gieu da cartas sursilvan numnadamain bun per il tscharvè ed il cor. Tgisà sch’il campiunadi da troccas a Schluein ha gist perquai puspè carmalà passa 70 trochistas e trochists en sala? Schegea, en il focus èn quella sonda franc stads ils puncts ed il titel – e cun quel èn quella giada Peter Montalta da Schluein e Norbert Carigiet da Glion ids a chasa.

Ina rectificaziun fiss bunamain donn

A Cuira han ins rectifitgà in sbagl istoric cun tavlas d’infurmaziun: Il Stadi liber da las Trais Lias è sa constituì il 1524 e betg il 1471 sco che l’obelisc sin la Plazza da la Regenza dat da crair. Entant ch’ins ha inaugurà las tavlas en la chapitala grischuna cun prominenza politica, n’è capità nagut a Vazarouls. Là insista in crap commemorativ sin il Rütli grischun anc senza rectificaziun sin la data sbagliada. Quai saja dentant bun uschia, ha l’archivari chantunal Reto Weiss ditg envers la FMR. Tenor el fissi bunamain donn da ruinar quest lieu idillic cun tavlas d’infurmaziun.

Ina buna schliaziun cunter il «super-gau»

Il solen ruaus dal Rütli grischun a Vazarouls (guarda sura) giavischassan ins probablamain era tar la Fundaziun per il provediment da sanadad Engiadin’Ota (SGO). Quella è numnadamain confruntada cun il «super-gau»: la serrada da l’ospital a Samedan. Tenor la presidenta da la fundaziun Selina Nicolay è dentant ina fitg buna schliaziun sin maisa per evitar quest scenari. La finala dovri dentant in GEA da la populaziun, sco ch’ella constatescha en il discurs cun la Posta Ladina.